30 ліпеня, Мінск /Кар. БЕЛТА/. У Беларусі прапануецца прыняць дадатковыя меры па павышэнні прэстыжу ваеннай службы. Аб гэтым ішла размова сёння на сустрэчы кіраўніка дзяржавы Аляксандра Лукашэнкі з актывам мясцовай вертыкалі па актуальных пытаннях грамадска-палітычнай абстаноўкі.
На мерапрыемстве ў ліку іншых выступіў ваенны камісар Гомельскай вобласці Андрэй Крываносаў, які выказаўся аб праблемных пытаннях у ваенна-патрыятычнай рабоце і прапанаваў меры па яе ўдасканаленні.
Ён канстатаваў, што далёка не ўсе грамадзяне бачаць сваю ролю ў абароне Айчыны, а сярод прызыўнікоў часам назіраюцца ўтрыманскія настроі, калі маладыя людзі лічаць, што не яны самі, а нехта іншы павінен абараняць Радзіму, праходзячы тэрміновую службу.
"З такой тэндэнцыяй мірыцца нельга. Адным з перспектыўных напрамкаў такой работы з'яўляецца далейшае павышэнне ў грамадстве прэстыжу тэрміновай ваеннай службы. Важна разумець, што справа абароны Айчыны - гэта не служба дзеля льгот і прэферэнцый, а свяшчэнны абавязак кожнага, хто называе сябе грамадзянінам сваёй краіны. Разам з тым чалавек, які з годнасцю выканаў воінскі абавязак, павінен быць упэўнены ў сваёй надзейнай сацыяльнай абароненасці. Значны пакет гарантый у сацыяльнай сферы для такіх грамадзян ужо ўведзены і ўступіў у законную сілу, але работа ў названым напрамку на гэтым не павінна спыніцца", - заявіў ваенкам.
Наступная праблема, на якую звярнуў увагу Андрэй Крываносаў, звязана з узроўнем эфектыўнасці выкладання вучэбнага прадмета "дапрызыўная і медыцынская падрыхтоўка". На яго думку, яна не ў поўнай меры адпавядае сучасным патрабаванням. Таму матэрыяльна-тэхнічная база цэнтраў дапрызыўнай падрыхтоўкі і школ патрабуе якаснага пераўтварэння. "Што яшчэ больш важна - неабходна стапрацэнтнае ўкамплектаванне педагагічнага складу кадрамі з ліку людзей, перакананых і валодаючых высокім узроўнем прафесіяналізму", - заявіў ваенкам.
Прапануецца таксама захаваць і мадэрнізаваць дзеючую сетку тэрытарыяльных цэнтраў дапрызыўнай падрыхтоўкі.
Андрэй Крываносаў абазначыў і недахоп цікавага кантэнту на ваенна-патрыятычную тэматыку. "У сувязі з гэтым лічу мэтазгодным прадугледзець у дзяржаўным бюджэце расходы на распрацоўку тэматычнага кантэнту і IT-платформ і аформіць адпаведны дзяржаўны заказ", - сказаў ён.
Ваенкам выказаўся і на тэму рэалізацыі праграмы патрыятычнага выхавання, распрацоўка якой вызначана рашэннем Усебеларускага народнага сходу. "Відавочна, што намечаныя планы вельмі маштабныя. Пры гэтым не выклікае сумненняў, што ўсё задуманае атрымаецца. Падзеі мінулага года паказалі, што, нягледзячы на каласальны знешні націск, беларускі народ, кіруемы моцным нацыянальным лідарам, аказаўся здольны процістаяць глабальным выклікам і захаваць сапраўды суверэнную краіну, якая дынамічна развіваецца. Гэта ўсяляе аптымізм і лішні раз пераконвае, што любоў да Радзімы закладзена ў менталітэце нашага народа, а затрачаныя намаганні і фінансавыя ўкладанні будуць шматразова апраўданы", - упэўнены Андрэй Крываносаў.-0-
