У Беларусі праходзяць сустрэчы кандыдатаў у Прэзідэнты і іх давераных асоб з працоўнымі калектывамі

13 студзеня, Магілёў /Кар. БЕЛТА/. Па ўсёй краіне ў рамках агітацыі праходзяць сустрэчы кандыдатаў у Прэзідэнты Беларусі і іх давераных асоб з працоўнымі калектывамі. Адна з іх адбылася ў Магілёве на базе ААТ "Магілёўскі ДБК", перадае карэспандэнт БЕЛТА.

З калектывам магілёўскага прадпрыемства сустрэўся адзін з кандыдатаў у Прэзідэнты Сяргей Сыранкоў. У час размовы з людзьмі ўзнімаліся пытанні, якія датычыліся пенсійнага забеспячэння, даступнасці медпаслуг, выхавання падрастаючага пакалення і сямейных каштоўнасцей, якасці адукацыі, знешняй палітыкі.

Сярод удзельнікаў сустрэчы - ветэран працы Людміла Слесарчук. У свой час жанчына працавала на прадпрыемстве начальнікам фармовачнага цэха, а пасля выхаду на пенсію прадоўжыла працоўную дзейнасць на пасадзе кладаўшчыка. Маючы актыўную грамадзянскую пазіцыю, яна не прапусціла ніводныя прэзідэнцкія выбары. Людміла Слесарчук упэўнена, што выбары Прэзідэнта - важнейшая падзея ў жыцці дзяржавы, а таму тут нельга быць абыякавым. "Праз выбар кіраўніка нашай краіны мы галасуем не толькі за чалавека, мы выбіраем далейшае жыццё нашай краіны, лёс сваіх дзяцей, унукаў і праўнукаў. Кожнага чалавека павінна хваляваць будучыня. А выбары даюць нам магчымасць паўдзельнічаць у гэтым, - падкрэсліла яна. - Я буду галасаваць за мір, дабрыню, працвітанне, за павагу адзін да аднаго, добрасуседства з усімі. Важна любіць адзін аднаго і сумленна працаваць. І ў нашай краіне тады ўсё будзе добра".

Паводле яе слоў, сустрэчы ў працоўных калектывах з кандыдатамі ў Прэзідэнты і іх даверанымі асобамі патрэбны. "У нас ёсць магчымасць з імі паразмаўляюць ужывую, задаць пытанні аб праграме, нейкія свае асабістыя, запытацца, якія ў іх планы і што яны хочуць зрабіць для працвітання нашай краіны і яе народа", - падкрэсліла яна.

Удзел у сустрэчы прыняла і моладзь прадпрыемства. Так, начальнік тэхнічнага аддзела Павел Бераставой другі раз будзе галасаваць на выбарах. Некалькі гадоў таму ён прыйшоў на Магілёўскі ДБК маладым спецыялістам і ўжо дарос да кіруючай пасады. "Я ўпэўнены ў тым, што ўсім грамадзянам важна прымаць удзел у электаральнай кампаніі, а асабліва - моладзі. У будучым менавіта моладзі прадаўжаць будаваць і развіваць нашу краіну. А таму трэба актыўна праяўляць сваю грамадзянскую пазіцыю. Ад нашага выбару шмат што залежыць", - адзначыў ён.

Сустрэчы з даверанымі асобамі і кандыдатамі ў Прэзідэнты праходзяць па ўсёй краіне. Яны даюць магчымасць бліжэй пазнаёміцца з кандыдатамі і іх праграмамі, задаць пытанні, якія цікавяць.