24 сакавіка, Мінск /Кар. БЕЛТА/. У Беларусі плануюць вывучыць асаблівасці ходу адначасовага захворвання на туберкулёз і COVID-19, паведаміў журналістам дырэктар РНПЦ пульманалогіі і фтызіятрыі Генадзь Гурэвіч, перадае карэспандэнт БЕЛТА.
"У нашым цэнтры пралячыліся больш за 20 пацыентаў з туберкулёзам і COVID-19. Мы плануем навуковае даследаванне па вывучэнні асаблівасцей ходу і вядзення гэтай камарбіднай паталогіі, але першыя ўражанні такія: асабліва цяжкага ходу захворванняў няма. Мы не бачылі выпадкаў вельмі цяжкага ходу COVID-19 пры туберкулёзе", - сказаў Генадзь Гурэвіч.
Ён адзначыў, што супрацьтуберкулёзная служба была задзейнічана для барацьбы з COVID-19. Больш за 25 працэнтаў ложкавага фонду было перапрафілявана, на ложках супрацьтуберкулёзных арганізацый пралечаны больш за 6,4 тыс. пацыентаў з каранавірусам.
Як адзначыў спецыяльны прадстаўнік рэгіянальнага дырэктара СААЗ у Беларусі доктар Масуд Дара, пакуль няма дакладных даных, якія сведчылі б пра больш цяжкі ход COVID-19 у пацыентаў з туберкулёзам, як і пра больш высокую рызыку іх інфіцыравання. "Цяпер мы якраз збіраем даныя, каб мець магчымасць сцвярджаць, ці ёсць якая-небудзь заканамернасць у ходзе захворвання пры спалучаных COVID-19 і туберкулёзе", - сказаў ён.
Масуд Дара заўважыў, што з-за пандэміі знізіўся ўзровень дыягностыкі туберкулёзу, паколькі акцэнт зрушыўся на іншую тэму, тым не менш гэта захворванне захоўвае сваю актуальнасць. Ён парэкамендаваў не зацягваць са зваротам ва ўстанову аховы здароўя за дыягностыкай як COVID-19, так і туберкулёзу пры наяўнасці сімптомаў, напрыклад кашлю на працягу трох і больш тыдняў.
Спецпрадстаўнік рэгіянальнага дырэктара СААЗ таксама выказаўся пра шматгадовае супрацоўніцтва СААЗ з Беларуссю ў лячэнні туберкулёзу, у тым ліку з множнай і шырокай лекавай устойлівасцю. "Спадар Гурэвіч і яго каманда правялі фенаменальную работу, яны з'яўляюцца сусветнымі першапраходцамі ў справе лячэння туберкулёзу з лекавай устойлівасцю", - адзначыў ён. Сведчаннем таго стала стварэнне на базе адукацыйнага цэнтра РНПЦ пульманалогіі і фтызіятрыі цэнтра СААЗ, які супрацоўнічае, - адзінага такога не толькі ў Беларусі, але і ў свеце. Масуд Дара растлумачыў, што наяўнасць цэнтра СААЗ, які супрацоўнічае, азначае, што дасягненні ў распрацоўцы новых прэпаратаў РНПЦ становяцца даступнымі калегам ва ўсім свеце. За мінулы год, нягледзячы на эпідэмію, там прайшлі вучобу 63 слухачы з 12 краін свету, праведзены чатыры адукацыйныя праграмы.
Што датычыцца Еўропы, колькасць новых выпадкаў туберкулёзу зніжаецца. "Калі я пачаў сваю работу ў рэгіянальным бюро СААЗ па тэме туберкулёзу, штогод у рэгіёне сярод 53 дзяржаў мы рэгістравалі каля паўмільёна выпадкаў, у мінулым годзе гэта лічба склала 240 тыс., - сказаў Масуд Дара. - Пры гэтым менавіта ў Еўрапейскім рэгіёне СААЗ рэгіструецца найбольш імклівае зніжэнне колькасці выпадкаў захворвання ў параўнанні з іншымі рэгіёнамі - прыкладна 5 працэнтаў у год. На 9 працэнтаў штогод зніжаецца смяротнасць, што мы лічым добрым дасягненнем".-0-
