9 красавіка, Мінск /Кар. БЕЛТА/. У Беларусі плануюць укараніць сістэму рэферэнтнага цэнаўтварэння на лякарствы, паведаміў журналістам міністр антыманапольнага рэгулявання і гандлю Уладзімір Калтовіч пасля навукова-практычнай канферэнцыі з міжнародным удзелам "Інвестыцыйная прывабнасць фармацэўтычнай галіны Рэспублікі Беларусь", перадае карэспандэнт БЕЛТА.
У адпаведнасці з указам нумар 366 у краіне рэгулююцца аптовыя і гандлёвыя надбаўкі абсалютна на ўсе лекавыя сродкі - айчынныя і імпартныя. Пры гэтым чым вышэйшая цана прэпарата, тым ніжэйшая надбаўка. Так, напрыклад, калі лекавы сродак каштуе 0,5 БВ, то аптэка можа дабавіць да 30 працэнтаў надбаўкі, калі звыш 10 БВ - не больш за 1 працэнт.
У той жа час, паводле слоў міністра, неўрэгуляванай застаецца цана вытворцы. "Мы прапанавалі сумесна з Міністэрствам аховы здароўя распрацаваць сістэму рэферэнтнага цэнаўтварэння. Гэта значыць, што спачатку будзе распрацаваны пералік жыццёва важных лякарстваў", - сказаў Уладзімір Калтовіч. Ён дадаў, што да канца першага паўгоддзя неабходна рэалізаваць так званы пілотны праект па цэнаўтварэнні на лекавыя прэпараты кардыялагічнага і анкалагічнага напрамкаў. Будуць распрацаваны правілы або метадычныя рэкамендацыі па эканамічным абгрунтаванні ўстанаўлення гранічнай цаны вытворцы. Прычым гэта датычыцца як айчынных, так і замежных кампаній. У выніку з'явіцца нарматыўна ўрэгуляваны парадак рэгістрацыі цаны па ўзгадненні з МАРГ. Такі вопыт ёсць, у прыватнасці, у Расіі. Асноўная задача такога механізма - павысіць даступнасць лекавых прэпаратаў для насельніцтва і лячэбна-прафілактычных устаноў.
Акрамя таго, на канферэнцыі ішла размова аб прымяненні норм так званых спецінвесткантрактаў. Аналагічнае заканадаўства створана ў Расіі. Размова ідзе аб тым, каб інвестар пры пэўнай суме інвестыцый атрымліваў гарантыі ад дзяржавы, якая будзе пэўны час (напрыклад, тры або пяць гадоў) закупляць па пэўнай цане за адзінку тавару нейкую долю выпускаемай прадукцыі. У Расіі гэта 30 працэнтаў выпускаемай прадукцыі. Аналагічны механізм плануюць укараніць і ў Беларусі, цяпер ідзе работа над адпаведным праектам нарматыўнага акта. "Мы гатовы абмяркоўваць гэта ў шырокім фармаце", - адзначыў Уладзімір Калтовіч.
Паводле яго слоў, гэта даволі складаны механізм. У такім выпадку дзяржава павінна гарантаваць, што, напрыклад, пяць гадоў будзе купляць той ці іншы прадукт па пэўнай цане. Узнікаюць пытанні: якой стане цана і што будзе, калі з'явяцца аналагі па больш нізкіх цэнах. "Значыць, гэты прадукт павінен быць інавацыйным", - дадаў міністр.
Адпаведную прапанову ўдзельнікі канферэнцыі - зацікаўленыя міністэрствы і фармацэўтычная прамысловасць - уключылі ў рэзалюцыю, што прынята па выніках канферэнцыі. У гэтым дакуменце таксама прапануецца для айчынных вытворцаў усіх форм уласнасці, якія ажыццяўляюць рэгістрацыю поўнага цыкла вытворчасці, разгледзець магчымасць дзяржаўнага фінансавання праграм па распрацоўцы інавацыйных і/або лякарстваў, плануемых да закупкі за кошт бюджэтных сродкаў, уключаючы правядзенне клінічных і біяэквівалентных выпрабаванняў. Каб аблегчыць рэгістрацыю на знешніх рынках і для стымулявання экспарту прапануецца разгледзець магчымасць кампенсацыі затрат на рэгістрацыю і правядзенне клінічных выпрабаванняў прэпаратаў для лакальных вытворцаў усіх форм уласнасці, праводзімых за мяжой. Удзельнікі таксама лічаць патрэбным разгледзець магчымасць устанаўлення прэферэнцый пры ўдзеле ў таргах па закупцы лекавых сродкаў для ўдзельнікаў - вытворцаў, якія выпускаюць айчынны прэпарат па поўным цыкле.
Канферэнцыя сабрала ў Мінску прадстаўнікоў зацікаўленых ведамстваў і фармацэўтычных кампаній. Удзельнікі абмеркавалі праблемныя аспекты фармацэўтычнай галіны, якія маюць патрэбу ў дапрацоўцы і наступным адлюстраванні ў нарматыўных прававых актах.-0-
