28 мая, Мінск /Кар. БЕЛТА/. У Беларусі плануецца павысіць празрыстасць дзейнасці грамадскіх аб'яднанняў, паведаміў міністр юстыцыі Алег Сліжэўскі на канферэнцыі "Рэалізацыя канстытуцыйнага права грамадзян на аб'яднанне", якая праходзіць у Міжнародным універсітэце "МІТСО" ў Мінску, перадае карэспандэнт БЕЛТА.
"У адпаведнасці з прапановай Міністэрства юстыцыі ў бягучым годзе запланавана падрыхтоўка законапраекта аб унясенні змяненняў у заканадаўства аб палітычных партыях і грамадскіх аб'яднаннях. У законапраекце плануецца замацаваць палажэнне аб тым, каб інфармацыя аб дзейнасці, у тым ліку фінансавая справаздачнасць, грамадскіх аб'яднанняў, палітычных партый была даступна шырокай грамадскасці. Гэта будзе накіравана на павышэнне празрыстасці дзейнасці гэтых арганізацый", - сказаў Алег Сліжэўскі.
У гутарцы з журналістамі міністр адзначыў, што многія грамадскія арганізацыі, паколькі з'яўляюцца некамерцыйнымі і не ставяць за мэту атрымаць прыбытак, часцей за ўсё існуюць за кошт узносаў, добраахвотных ахвяраванняў. Таму справядліва, лічыць ён, калі грамадзяне і арганізацыі, якія аказваюць дабрачынную, бязвыплатную дапамогу такім арганізацыям, будуць больш ведаць, як гэтыя сродкі расходуюцца.
Таксама плануецца прадаставіць магчымасць грамадскім аб'яднанням і палітычным партыям падаваць дакументы для дзяржрэгістрацыі і абменьвацца інфармацыяй з рэгіструючымі органамі ў электронным выглядзе. Магчыма, будуць унесены змяненні, накіраваныя на спрашчэнне працэдуры дзяржаўнай рэгістрацыі грамадскіх аб'яднанняў у плане скарачэння падаваемых для гэтага пераліку дакументаў. Плануецца спрасціць працэдуру прадастаўлення грамадскімі арганізацыямі штогадовай інфармацыі аб прадаўжэнні сваёй дзейнасці.
Меркаванні, выказаныя ўдзельнікамі канферэнцыі, магчыма, таксама паслужаць напрамкамі для ўдасканалення заканадаўства. Работа над законапраектам ужо вядзецца.
Права на свабоду аб'яднання гарантавана Усеагульнай дэкларацыяй правоў чалавека. Гэта значыць, кожны чалавек мае права на аб'яднанне з іншымі людзьмі па агульных інтарэсах, а таксама права не ўступаць ні ў якія аб'яднанні. Беларускае заканадаўства ў поўнай меры ўзгадняецца з патрабаваннямі міжнародных прававых актаў. Так, у Канстытуцыі ў якасці аднаго з асноўных замацавана права на свабоду аб'яднання. Прыняты законы аб грамадскіх аб'яднаннях, палітычных партыях, прафесійных саюзах.
За час незалежнасці Беларусі даволі актыўна сталі развівацца грамадскія арганізацыі, грамадзянская супольнасць. На 1 студзеня ў краіне зарэгістравана амаль 3 тыс. грамадскіх аб'яднанняў, каля 43 тыс. арганізацыйных структур грамадскіх аб'яднанняў, 28 прафсаюзаў і прыкладна 25 тыс. арганізацыйных структур прафесійных саюзаў, 15 палітычных партый, амаль 1,2 тыс. партыйных арганізацый.
Заканадаўства і правапрымяняльная практыка ў рэспубліцы ідзе па шляху ўсё большага ўключэння грамадскіх арганізацый у розныя пытанні жыцця дзяржавы і грамадства. У прыватнасці, палітычныя партыі і грамадскія аб'яднанні могуць удзельнічаць у розных электаральных кампаніях. Так, першыя маюць права вылучаць са свайго складу кандыдатаў у дэпутаты, другія - у склад выбарчых камісій, у якасці наглядальнікаў на выбарах. Грамадскія арганізацыі ўваходзяць у розныя саветы. У прыватнасці, пры Мінюсце створана грамадская наглядальная камісія, што праводзіць кантроль за правамі асуджаных, якія адбываюць пакаранне ў папраўчых установах. Аналагічныя камісіі створаны пры галоўных упраўленнях юстыцыі ва ўсіх абласцях і Мінску. Акрамя таго, грамадскія арганізацыі часта выступаюць экспертамі пры распрацоўцы нарматыўных прававых актаў.
Удзельнікі канферэнцыі абмяркоўваюць пытанні, звязаныя з рэалізацыяй у Беларусі права грамадзян на аб'яднанне, роляй грамадскіх арганізацый у сучасных рэаліях, а таксама іншыя пытанні, звязаныя з развіццём грамадзянскай супольнасці ў краіне. У канферэнцыі прымаюць удзел прадстаўнікі Канстытуцыйнага суда, Савета Рэспублікі і Палаты прадстаўнікоў Нацыянальнага сходу, Федэрацыі прафсаюзаў Беларусі, Нацыянальнага цэнтра заканадаўства і прававых даследаванняў, рэспубліканскага грамадскага аб'яднання "Белая Русь" і іншых грамадскіх аб'яднанняў, вучоныя.
Мерапрыемства, прымеркаванае да 25-годдзя Канстытуцыі Беларусі і станаўлення інстытута прэзідэнцтва, арганізавана Міністэрствам юстыцыі сумесна з установай адукацыі Федэрацыі прафсаюзаў Беларусі "Міжнародны ўніверсітэт "МІТСО".-0-
