11 сакавіка, Мінск /Кар. БЕЛТА/. У Беларусі на выхадных стане цяплей, паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"Халодны шырокі антыцыклон над еўрапейскай тэрыторыяй Расіі некалькі дзён стрымліваў рух на ўсход атлантычных цыклонаў, і ў Беларусі назіраўся зімовы характар надвор'я са сярэднесутачнымі тэмпературамі на 1-5 градусаў халаднейшымі, чым звычайна. У бліжэйшыя суткі сітуацыя зменіцца. У Паўночнай Атлантыцы закруціўся цыкланічны віхор, названы нямецкімі метэаролагамі Клаус. Цыклон прадаўжае набіраць сілу і прабіваецца на ўсход. Ён нясе рэзкія змяненні ў надвор'і ў многіх дзяржавах Еўропы, у тым ліку і ў нашай краіне", - расказалі ў Белгідрамеце.
У пятніцу, 12 сакавіка, надвор'е ў Беларусі будуць вызначаць актыўныя франтальныя раздзелы ад гэтага цыклону. Атмасферны ціск пачне інтэнсіўна падаць. Павялічыцца і ўшчыльніцца воблачнасць. На большай частцы тэрыторыі пройдуць ападкі (снег, мокры снег, які будзе пераходзіць у дождж). Месцамі прагназуецца моцны снег, мяцеліца, магчымы слабы галалёд. На асобных участках дарог чакаецца галалёдзіца. Вецер будзе паўднёвы, паўднёва-заходні моцны парывісты. Тэмпература паветра ўначы складзе ад нуля да мінус 6 градусаў, па ўсходзе - мінус 7-9. Удзень - ад мінус 2 па ўсходзе да плюс 8 градусаў па паўднёвым захадзе краіны.
У суботу і нядзелю, 13-14 сакавіка, рэспубліка будзе ва ўладзе цёплых паветраных мас атлантычнага паходжання і франтальных раздзелаў. Усталюецца адліга. На большай частцы Беларусі пройдуць кароткачасовыя ападкі (дождж, мокры снег). Уначы і раніцай месцамі чакаюцца слабыя туман і галалёд, на дарогах галалёдзіца. Вецер прагназуецца паўднёва-заходні, паўднёвы парывісты. Тэмпература паветра ўначы складзе ад мінус 4 да плюс 4 градусаў. Удзень будзе плюс 3-10, у паўднёвых раёнах месцамі да 12 градусаў цяпла.
У пачатку наступнага тыдня надвор'е не зменіцца. Захаваецца павышаны тэмпературны рэжым, і ў многіх рэгіёнах пройдуць ападкі, у асноўным у выглядзе дажджу, снежнае покрыва прадоўжыць раставаць.-0-
