У Беларусі хочуць перагледзець падыходы да дзяржпадтрымкі пры будаўніцтве жылля

19 жніўня, Мінск /Кар. БЕЛТА/. У Беларусі хочуць перагледзець падыходы да дзяржпадтрымкі пры будаўніцтве жылля. Аб гэтым расказаў журналістам міністр архітэктуры і будаўніцтва Руслан Пархамовіч па выніках нарады кіраўніка дзяржавы з кіраўніцтвам Савета Міністраў, перадае карэспандэнт БЕЛТА.

"Мы адпрацавалі цэлы пакет дакументаў адносна жыллёвага будаўніцтва. Улічваючы перагружанасць і складанасць нарматыўных прававых актаў па аказанні дзяржпадтрымкі пры будаўніцтве жылля, было прынята рашэнне да канца года падрыхтаваць адзін вялікі сістэмны дакумент, які будзе ў тым ліку і пераглядаць падыходы да дзяржпадтрымкі. Гэта будзе датычыцца змянення Жыллёвага кодэкса адносна норм патрэбнасці, катэгорый маючых патрэбу ў паляпшэнні жыллёвых умоў і парадку прадастаўлення той ці іншай дзяржаўнай падтрымкі", - расказаў Руслан Пархамовіч.

Паводле яго слоў, асаблівая ўвага будзе ўдзелена будаўніцтву арэнднага жылля, падтрымцы шматдзетных сем'яў, ваеннаслужачых і іншых катэгорый. "Але, думаю, такога вялікага пераліку, як мы сёння маем, ужо не будзе. Дзяржпадтрымка будзе сканцэнтравана ў больш вузкія і больш профільныя і актуальныя напрамкі", - падкрэсліў міністр.

У цэлым, каб замацаваць усе прапанаваныя навацыі, неабходна ўнесці змяненні ў пяць указаў кіраўніка дзяржавы. Пры гэтым важна пазбегнуць юрыдычных калізій. Менавіта таму і прапануецца падрыхтаваць адзіны комплексны дакумент, які вызначае правілы гульні для ўсіх. Кіраўнік дзяржавы даручыў прапрацаваць гэта пытанне да новага года. Гэта не выключае таго, што некаторыя пытанні будуць вырашаны ў бліжэйшы час і замацаваны ў іншых нарматыўных прававых актах.-0-