У Беларусі 14-дзённы водпуск бацьку пры нараджэнні дзіцяці можа стаць часткова аплатным 

12 кастрычніка, Мінск /Кар. БЕЛТА/. У Беларусі 14-дзённы водпуск бацьку пры нараджэнні дзіцяці можа стаць часткова аплатным. Аб гэтым у праекце БЕЛТА "Краіна гаворыць" паведаміла начальнік упраўлення народанасельніцтва, гендарнай і сямейнай палітыкі Міністэрства працы і сацыяльнай абароны Святлана Белаш.

У Беларусі бацьку (айчыму) пры нараджэнні дзіцяці прадастаўляецца кароткатэрміновы водпуск да 14 каляндарных дзён на працягу шасці месяцаў пасля нараджэння немаўляці. Звычайна гэты водпуск прадастаўляецца без захавання зарплаты, калі іншае не прадугледжана калектыўным дагаворам або работадаўцам. "У гэты перыяд бацька разам з маці можа ажыццяўляць догляд дзіцяці. Такая магчымасць з'явілася ў нас у 2020 годзе. З таго часу мы ўжо двойчы прааналізавалі практыку прадастаўлення гэтага водпуску. Таты не вельмі ідуць на гэта. Асноўная прычына - у адсутнасці аплаты гэтага перыяду. У тых арганізацыях, дзе наймальнікам прадугледжана аплата гэтага водпуску, таты яго бяруць. Таму цяпер мы працуем над тым, каб унесці змяненні ў Працоўны кодэкс, мы прапануем часткова аплачваць гэты водпуск. Паглядзім, як гэта норма пойдзе. Мы ж чакаем яшчэ і водгуку наймальнікаў. Дзяржава возьме на сябе абавязацельствы ў памеры 50 працэнтаў, калі норма будзе падтрымлівацца, думаем, што і наймальнікі яе падтрымаюць. Але на іх мы такі абавязак не ўскладаем, проста чакаем сацыяльнай адказнасці", - праінфармавала Святлана Белаш.

Намеснік старшыні камітэта па працы, занятасці і сацыяльнай абароне Магілёўскага аблвыканкама Святлана Сцяпанава канстатавала, што ў рэгіёне ёсць практыка, калі некаторыя прадпрыемствы павялічваюць працягласць гэтага водпуску і прадугледжваюць яго аплату.

У цэлым у Беларусі водпуск па доглядзе дзіцяці да трох гадоў можа ўзяць маці, у выпадках, калі маці выходзіць на работу або на вучобу, гэты водпуск можа ўзяць тата або любы іншы працуючы сваяк дзіцяці. "Таты нячаста карыстаюцца такой магчымасцю. Колькасць бацькаў у межах 1 працэнта ад агульнай колькасці асоб, якія знаходзяцца ў водпуску па доглядзе дзіцяці. Інакш кажучы, у асноўным гэта нагрузка кладзецца на маці. Мы гэта тлумачым існуючымі стэрэатыпамі, менталітэтам: усё ж такі наша грамадства місію па доглядзе дзіцяці больш ускладае на жанчыну", - адзначыла прадстаўнік Міністэрства працы.-0-

*Праект створаны за кошт сродкаў мэтавага збору на вытворчасць нацыянальнага кантэнту