12 лютага, Мінск /Кар. БЕЛТА/. У адукацыйны працэс трэба прыўносіць больш крэатыўнасці. Такое меркаванне выказаў карэспандэнту БЕЛТА рэктар БДУ, доктар педагагічных навук, прафесар Андрэй Кароль у час VI Усебеларускага народнага сходу.
Рэктар падкрэсліў, што патрабаванне часу - сучасныя падыходы ў адукацыі. "Сёння для ўсяго чалавецтва адной з галоўных з'яўляецца праблема чутнасці адзін аднаго, - лічыць Андрэй Кароль. - Чалавек дрэнна чуе іншых, таму што не чуе сябе. Да таго ж паскораны рытм жыцця прыводзіць да страты ўнутранай прасторы і сэнсаў чалавека. Гэта прыводзіць да павышэння ступені аднастайнасці і аднолькавасці людзей у грамадстве, фарміравання масавага чалавека".
Як педагог, ён бачыць "прычыну гэтых з'яў у інфармацыйным падыходзе ў адукацыі, пры якім інфармацыя як вопыт чалавецтва перадаецца ад настаўніка да вучня". "Такая тактыка вядзе да маналагічнасці, стэрэатыпнасці мыслення і паводзін вучня. Ён ужо не здольны выйсці за свае межы, паглядзець на сябе збоку і крэатыўна дзейнічаць у нестандартнай сітуацыі. У ім фарміруецца навык збору вопыту чалавецтва, па сутнасці, "правільнай" і аднолькавай для ўсіх інфармацыі. Але ўсе вучні розныя, а вымушаны даваць аднолькавыя адказы", - прадоўжыў дэлегат.
На яго думку, аднолькавасць прыводзіць да страты ўнікальнасці асобы. "Эфектыўнай альтэрнатывай бачу іншы падыход у адукацыі, дыялогавы, арыентаваны на адкрыццё вучнем самога сябе, сваіх сэнсаў, мэт, пытанняў, магчымасць вырабляць свой прадукт, а не пераймаць чужое", - адзначыў Андрэй Кароль.
"Адукацыя - гэта не сума навук або вопыт, што перадаецца чалавеку. Нельга перадаць веды або вопыт - іх можна вырасціць знутры, - лічыць рэктар. - Адукацыя павінна быць накіравана на тое, што патрэбна чалавеку, на выяўленне, раскрыццё і рэалізацыю яго патэнцыялу адпаведна яго місіі і прызначэнню".
Андрэй Кароль расказаў, што ў БДУ рэалізуецца сістэма крэатыўнай адукацыі, пры якой кожны студэнт можа раскрыць свой патэнцыял, праявіць сябе і самарэалізавацца. Гэта ўжо выбудаваная сістэма. Рэгулярна праводзяцца семінары па фарміраванні эўрыстычных якасцей педагога, здольнага індывідуалізаваць працэс падрыхтоўкі студэнтаў і стварыць умовы для раскрыцця яго творчага патэнцыялу. Функцыянуе таксама міжвузаўскі партал "Метадалогія, змест, практыка крэатыўнай адукацыі", на ўсіх факультэтах укараняюць крэатыўныя формы навучання, працуе "Педагагічная майстэрня анлайн-навучання. "Дарэчы, апошні праект стаў вынікам аператыўнага рэагавання на новыя ўмовы і рэальнасць, выкліканыя пандэміяй", - прадоўжыў Андрэй Кароль.
Ён таксама закрануў дыстанцыйнае навучанне: "Гэта, перш за ўсё, адукацыя, а потым тэхналогіі. І тут вельмі важна пры захаванні бесперапыннасці працэсу не страціць у якасці. Нельга ў натуральную велічыню перанесці змест, формы, метады вочнага навучання ў "дыстант" - па той бок камп'ютара або смартфона. Дыстанцыйнаму навучанню патрэбны інавацыйныя тэхналогіі, нацэленыя на камунікацыю і даследаванне, раскрыццё творчых якасцей студэнта, яго патэнцыялу і таленту. Студэнт не будзе механічна капіраваць "чужую" інфармацыю, а створыць свой адукацыйны прадукт, не падобны на вынік аднагрупніка".
У БДУ ўдалося ў час пандэміі захаваць якасць адукацыі. "Мы былі гатовы тэхнічна і метадычна. У нас трэці год працуе адукацыйны партал БДУ. Гэта не накапляльнік навучальных матэрыялаў. Тут штодзень праводзіцца 1580 заняткаў у рэжыме відэаканферэнцый, ідзе суправаджэнне звыш 7,6 тыс. дысцыплін, працуе "Педагагічная майстэрня анлайн-навучання", форум "Пытанні-адказы па Moodle". Размешчаны банк творчых, эўрыстычных, даследчых заданняў з 15 тыс. напрацовак і больш як 500 аўтарскімі метадычнымі распрацоўкамі", - сказаў рэктар.
На яго думку, крэатыўная сістэма навучання дае студэнтам магчымасць адкрыць сябе, развіць свае асабістыя якасці, навучыцца ставіць мэты, задаваць пытанні, рэфлексаваць. "Сутнасць гэтага падыходу ў тым, што студэнт спачатку вывучае аб'ект навакольнага свету, культуры, мастацтва, стварае свой суб'ектыўны прамежкавы вынік і потым параўноўвае яго з культурна-гістарычным аналагам. Параўнанне "свайго і чужога" дае магчымасць паглядзець на сябе вачамі іншых людзей, убачыць сваю ўнікальнасць і асаблівасць. Па сутнасці, на анлайн-платформе пры ўмове наяўнасці адукацыйных інавацый мы індывідуалізуем навучанне і захоўваем яго якасць", - рэзюмаваў доктар педагагічных навук.-0-
