15 лютага, Мінск /Кар. БЕЛТА/. Дэпутаты рыхтуюць да другога чытання папраўкі ў некаторыя законы па прававым рэгуляванні жыллёвых адносін, у тым ліку ў Жыллёвы кодэкс. У яго новай рэдакцыі згодна з законапраектам вырашаць пытанне з нормай плошчы для маючых патрэбу ў паляпшэнні жыллёвых умоў. Аб гэтым карэспандэнту БЕЛТА паведаміў намеснік старшыні Пастаяннай камісіі па працы і сацыяльных пытаннях Палаты прадстаўнікоў Алег Леўшуноў.
Аўтары законапраекта ўдакладнілі склад плошчаў памяшканяў, якія ўключаюцца ў агульную жылплошчу. Паводле дзеючага ЖК, гэта сума жылой плошчы і плошчы падлогі дапаможных памяшканняў, акрамя плошчы падлогі балконаў і лоджый. У новай версіі кодэкса выключэнне складуць таксама тэрасы і неацяпляльныя халодныя памяшканні. Такім чынам будзе вырашана пытанне па нормах аднясення грамадзян да маючых патрэбу ў паляпшэнні жыллёвых умоў. "Цяпер наяўнасць вялікіх лоджый, тэрас, неацяпляльных кладовак або верандаў не будзе разглядацца як падстава для адмаўлення ў прыняцці на ўлік", - удакладніў Алег Леўшуноў.
Ён расказаў аб некаторых іншых навацыях законапраекта. Так, у ЖК пашырана паняцце сваякоў, куды прапануецца ўключыць членаў сям'і не толькі мужа і жонкі, але і іх дзяцей. "На практыцы людзі сутыкаюцца з цяжкасцямі. Напрыклад, муж дачкі пры ўсяленні ў кватэру яе бацькоў не можа быць прызнаны членам сям'і нават пры наяўнасці пісьмовага пагаднення. Хоць фактычна яны вядуць агульную гаспадарку. У судовым парадку такія грамадзяне могуць быць прызнаны членамі сям'і толькі пасля пяці гадоў пражывання з уласнікам, наймальнікам і гэтак далей. Пры ўнясенні паправак улічваўся таксама арт. 61 Кодэкса аб шлюбе і сям'і, у адпаведнасці з якім сваякі жонкі прызнаюцца сваякамі для мужа", - адзначыў парламентарый.
У адпаведнасці з законапраектам са сферы рэгулявання Жыллёвага кодэкса выключаюцца адносіны, звязаныя з прыватызацыяй "квадратаў" дзяржаўнага жыллёвага фонду і прадастаўленнем іх па дагаворах паднайму. З 1 ліпеня 2016 года тэрмін звароту грамадзян за прыватызацыяй займаемага жылля скончыўся, а абавязацельствы па дагаворах паднайму спынены. Удакладняецца парадак прадастаўлення жылля дзяржаўнага жылфонду, з улікам яго новай структуры: увядзенне арэнднага жылля, скасаванне жылых памяшканняў спецыяльнага службовага жыллёвага фонду і службовых жылых памяшканняў.
Законапраект нацэлены на тое, каб удасканаліць нормы ЖК з улікам практыкі яго прымянення, прывесці яго ў адпаведнасць з заканадаўчымі актамі, сярод якіх указ ад 16 снежня 2013 года нумар 563 "Аб некаторых пытаннях прававога рэгулявання жыллёвых адносін" і зацверджанае ім палажэнне аб уліку грамадзян, маючых патрэбу ў паляпшэнні жыллёвых умоў, і аб парадку прадастаўлення жылых памяшканняў дзяржаўнага жыллёвага фонду.-0-
