Сцяг Панядзелак, 27 мая 2024
Усе навіны
Усе навіны
Грамадства
20 сакавіка 2023, 12:43

Тыдзень фінансавай дасведчанасці дзяцей і моладзі пачаўся ў Беларусі

20 сакавіка, Мінск /Кар. БЕЛТА/. Тыдзень фінансавай дасведчанасці дзяцей і моладзі пачаўся ў Беларусі і прадоўжыцца да 24 сакавіка, перадае карэспандэнт БЕЛТА.

Тыдзень фінансавай дасведчанасці праводзіцца ў Беларусі ўжо 10-ы раз. Асноўнай яго тэмай стане планаванне асабістых фінансаў. "Мы з 2015 года традыцыйна праводзім урачыстую цырымонію адкрыцця тыдня. Гэта міжнароднае мерапрыемства праводзіцца ў многіх краінах свету. У бягучым годзе на цырымоніі дыстанцыйна прысутнічае больш за 50 школ з усіх рэгіёнаў Беларусі, а фізічна - 9-ы клас мінскай школы нумар 201. Удзел актыўны, цікавасць у дзяцей высокая", - расказаў старшыня Беларускай валютна-фондавай біржы Андрэй Аўхіменя.

Дзеці павінны добра разумець, як расходаваць, прымнажаць і захоўваць грошы, а таксама якія біржавыя фінансавыя інструменты можна выкарыстоўваць для гэтага, дадаў кіраўнік БВФБ. "Гэта няпроста, але неабходна, каб у будучым не стаць ахвярай махляроў і правільна забяспечваць сваю будучыню. Гэтым мерапрыемствам мы расстаўляем акцэнты і звяртаем увагу грамадства на неабходнасць павышэння фінансавай дасведчанасці, але такую работу неабходна праводзіць штодзень", - упэўнены ён.

На працягу тыдня ва ўсіх банках, лізінгавых кампаніях і іншых фінансавых арганізацыях пад эгідай Нацыянальнага банка Беларусі пройдуць дні адкрытых дзвярэй, экскурсіі, конкурсы, віктарыны, урокі фінансавай дасведчанасці. У даступнай гульнявой форме школьнікам будуць выкладаць складаныя інструменты і банкаўскія прадукты, каб дзеці разумелі, як іх выкарыстоўваць.

"Нацбанк арганізуе і каардынуе гэты тыдзень фінансавай дасведчанасці дзяцей і моладзі ўжо на працягу 10 гадоў. Банкі, мікрафінансавыя арганізацыі, лізінгавыя кампаніі раскажуць хлопцам і дзяўчатам пра дзейнасць сваіх арганізацый, важнасць фінансавых ведаў. Гэта інфармацыйная кампанія, якая праходзіць на бягучым тыдні ва ўсім свеце", - расказала начальнік аддзела фінансавай асветы ўпраўлення інфармацыі і грамадскіх сувязей Нацыянальнага банка Юлія Саковіч.

Нацбанк дае магчымасць павышаць фінансавую дасведчанасць не толькі ў рамках тэматычнага тыдня, падкрэсліла яна. "Сумесна з Міністэрствам адукацыі мы падрыхтавалі факультатыў і адпаведны падручнік для 8-9-х класаў. Сёлета, спадзяёмся, убачыць свет такі падручнік для 5-7-х класаў. Акрамя таго, дзейнічае адзіны партал фінансавай дасведчанасці для шырокіх мас, праводзяцца розныя конкурсы і алімпіяда па фінансавай дасведчанасці, - дадала яна. - Фінансавая дасведчанасць - асноўнае патрабаванне паспяховага жыцця любога сучаснага чалавека. Як рацыянальна зберагаць, траціць, як адказна адносіцца да складаных пытанняў узяцця грошай у пазыку і інвестыцый - усё гэта пытанні фінансавай дасведчанасці".

Цырымонія ўрачыстага адкрыцця Тыдня фінансавай дасведчанасці дзяцей і моладзі адбылася на пляцоўцы Беларускай валютна-фондавай біржы і сімвалічны ўдар аб біржавы звон даў старт тэматычным мерапрыемствам.-0-

Падпісвайцеся на нас у
Twitter
Топ-навіны
Свежыя навіны Беларусі