18 верасня, Мінск /Кар. БЕЛТА/. Толькі экстрэмісты баяцца вярнуцца ў Беларусь, заявіў карэспандэнту БЕЛТА дэпутат Палаты прадстаўнікоў, старшыня Ліберальна-дэмакратычнай партыі Беларусі Алег Гайдукевіч, каменціруючы ўказ Прэзідэнта Беларусі Аляксандра Лукашэнкі нумар 278 "Аб парадку выдачы дакументаў і ажыццяўлення дзеянняў".
Дакумент накіраваны на далейшае ўдасканаленне парадку ажыццяўлення адміністрацыйных працэдур і аптымізацыю дзейнасці дыпламатычных прадстаўніцтваў і консульскіх устаноў Беларусі.
"Абсалютна правільны ўказ Прэзідэнта. На краіну націскаюць, рызыкі тэрактаў узрастаюць, вайна ідзе па суседстве - мы павінны засцерагчы нашых грамадзян, у тым ліку і тых, хто знаходзіцца за мяжой. Для нармальных грамадзян ніякай праблемы няма прыехаць на радзіму, хутка абмяняць дакументы і атрымаць новы пашпарт. Што датычыцца злачынцаў, то яны павінны нарэшце прызнаць праўду: вы даўно працуеце ўжо на іншыя краіны - на Польшчу, Літву, ЗША. Атрымлівайце пашпарты гэтых краін і там і заставайцеся. Вы ўжо даўно не грамадзяне Беларусі, па сутнасці. Вы ўсё робіце супраць Беларусі, працуеце супраць сваёй краіны", - сказаў Алег Гайдукевіч.
Пры гэтым у нас вельмі мяккае заканадаўства, адзначыў дэпутат. "У многіх краінах Еўропы прадугледжана пазбаўленне грамадзянства за менш сур'ёзныя рэчы. А мы нікога яшчэ не пазбаўляем. Абмяняй пашпарт і жыві спакойна далей. Ты баішся прыехаць у Беларусь? Значыць, ты злачынец, - падкрэсліў ён. - І яшчэ адзін момант важны. Тыя, хто, напрыклад, на эмоцыях выехаў у 2020-м - мы вас таксама ратуем. Сёння вам дадуць на Захадзе фількаву грамату, нейкую паперку польскую ці літоўскую, а потым адправяць на ўкраінскі фронт. Я звяртаюся да тых, хто эмоцыям у 2020 годзе паддаўся: прыязджайце таксама, мы вас ратуем ад вайны, прыніжэння, ад рабства, якое чакае вас на Захадзе. Вы будзеце на другіх ролях працаваць на іх эканоміку. Таму гэты ўказ накіраваны на абарону нашай краіны, бяспеку нашых грамадзян унутры краіны і на бяспеку нават тых, хто выехаў. Хутчэй вяртайцеся і хутчэй трапіце ў мір і спакой. Нармальнаму грамадзяніну памяняць пашпарт праблемы няма, а экстрэміст баіцца прыехаць - таму што крымінальная справа".
"Захад страціў пасля 2020 года магчымасць уплываць на ўнутрыпалітычныя працэсы ў нашай краіне. Мы спачатку знішчылі пятую калону, ліквідавалі партыі і грамадскія арганізацыі, якія гадамі фінансаваліся Захадам. А цяпер наступны крок - акрамя абароны грамадзян і вырашэння арганізацыйных пытанняў, гэта яшчэ і канчатковы ўдар па пятай калоне. Там заставайцеся і жывіце тыя, хто здрадзіў краіне і не хоча вяртацца. Нармальных грамадзян чакаем сюды. Яны цяпер замітусіліся там, на Захадзе, таму што не могуць на нас паўплываць ніяк. Ваенным шляхам нас не перамагчы, санкцыямі не атрымалася, а гэты ўказ яшчэ і знішчае магчымасць унутры краіны арганізаваць нейкія незаконныя дзеянні", - дапоўніў Алег Гайдукевіч.-0-
