Супрацоўніцтва ў лясной сертыфікацыі Беларусь і Расія выведуць на новы ўзровень

7 мая, Мінск /Кар. БЕЛТА/. Беларусь і Расія намецілі шляхі супрацоўніцтва ў галіне лясной сертыфікацыі. Аб гэтым ішла размова ў час рабочай сустрэчы прадстаўнікоў Дзяржаўнага камітэта па стандартызацыі і Федэральнага агенцтва па тэхнічным рэгуляванні і метралогіі Расіі, праведзенай на пляцоўцы Беларускага дзяржаўнага інстытута стандартызацыі і сертыфікацыі, паведамілі БЕЛТА ў прэс-службе Дзяржстандарту.

Спецыялісты вывучылі сістэмы лясной сертыфікацыі Беларусі і Расіі, адзначыўшы як падобныя падыходы і патрабаванні, так і асаблівасці. Для знаходжання шляхоў збліжэння і магчымасцей узаемнага прызнання рэзультатаў нацыянальнай сертыфікацыі эксперты УП "Дзіпралес" і Расійскага інстытута стандартызацыі падрыхтавалі праект дарожнай карты супрацоўніцтва. Дакумент будзе накіраваны на ўзгадненне профільным ведаствам, пасля чаго адбудзецца яго падпісанне.

Беларускую дэлегацыю ўзначальвала начальнік упраўлення ацэнкі адпаведнасці і ліцэнзавання Дзяржстандарту Вольга Бабко. У яе склад таксама ўвайшлі прадстаўнікі БелДІСС, Беларускага дзяржаўнага цэнтра акрэдытацыі і УП "Белдзіпралес" як органа па лясной сертыфікацыі. Расійскую дэлегацыю ўзначальвала намеснік генеральнага дырэктара Расійскага інстытута стандартызацыі Алена Лебядзінская. Таксама ў фармаце відэаканферэнцсувязі да размовы далучыліся прадстаўнікі шэрага прадпрыемстваў лясной галіны.-0-