Супрацоўніцтва беларускіх медыкаў з прадстаўнікамі кітайскай медыцыны правінцыі Чжэцзян будзе ўзмоцнена

18 верасня, Мінск /Кар. БЕЛТА/. Генеральны консул Беларусі ў Шанхаі Андрэй Андрэеў 18 верасня сустрэўся з вядучым урачом бальніцы пры Універсітэце традыцыйнай кітайскай медыцыны правінцыі Чжэцзян Яа Беншунем. Аб гэтым карэспандэнту БЕЛТА паведамілі ў беларускай загранустанове ў Шанхаі.

Сустрэча адбылася ў Генеральным консульстве Беларусі. Кітайскі эксперт накіроўваецца ў Мінскую абласную клінічную бальніцу з трохмесячным візітам для абмену вопытам і прымянення методык традыцыйнай кітайскай медыцыны ў Беларусі.

У ходзе сустрэчы бакі абмеркавалі практычныя меры па далейшым развіцці кітайска-беларускага Цэнтра традыцыйнай кітайскай медыцыны ў Мінскай вобласці з улікам задач, якія стаяць па нарошчванні двухбаковага ўзаемадзеяння ў медыцынскай сферы і рэалізацыі дамоўленасцей, дасягнутых у ходзе афіцыйнага візіту прэм'ера Дзяржаўнага савета КНР Лі Цяна ў Беларусь у жніўні 2024 года.

Кітайска-беларускі Цэнтр традыцыйнай кітайскай медыцыны на базе Мінскай абласной клінічнай бальніцы адкрыты пры садзейнічанні правінцыі Чжэцзян. З падпісаннем у лістападзе 2022 года пагаднення аб супрацоўніцтве паміж галоўным упраўленнем па ахове здароўя Мінскага аблвыканкама і Камітэтам па ахове здароўя правінцыі Чжэцзян пачаўся чарговы этап актыўнага навукова-практычнага супрацоўніцтва беларускіх і кітайскіх медыкаў у гэтай сферы.-0-