"Сумленная размова пра будучыню краіны". У Барысаве стартавала акцыя "Беларусь адзіная"

 

26 жніўня, Барысаў /Кар. БЕЛТА/. У Барысаве далі старт рэспубліканскай інфармацыйна-асветнай акцыі "Беларусь адзіная", перадае карэспандэнт БЕЛТА.

Як адзначыў журналістам старшыня праўлення РДГА "Беларускае таварыства "Веды" Вадзім Гігін, з 2021 года традыцыйна акцыя праходзіць па ўсёй краіне напярэдадні 17 верасня - Дня народнага адзінства.

"Мы фактычна пачынаем новы грамадска-палітычны год, звяраем гадзіннікі. Безумоўна, тэматыка адрозніваецца. Час патрабуе таго, каб мы пастаянна прымянялі новыя формы работы, і таварыства "Веды" на гэта арыентавана. Нядаўна адбылася вялікая нарада па рэалізацыі дырэктывы Прэзідэнта нумар 12. Калі ўважліва чытаць яе, то гэта не проста змяненне формы падачы, але і рост дынамікі грамадскіх працэсаў, стаўка на палітычна актыўных грамадзян", - адзначыў Вадзім Гігін.
Пры гэтым ён дадаў, што акцыя ў плане тэхналогій адпавядае патрабаванням часу. Прадугледжаны работа чат-бота, выкарыстанне тэхналогій штучнага інтэлекту. "Але форма ніколі не павінна замяняць змест. Галоўнае - адкрытая, сумленная размова з аўдыторыяй. Гэта наш моцны бок. Ужо не раз было даказана ў час даволі сур'ёзных выпрабаванняў, што прамы дыялог з аўдыторыяй - тое, што дае магчымасць падтрымліваць узаемаразуменне, выбудоўваць грамадзянскую супольнасць, кансалідаваць нашы патрыятычныя сілы", - сказаў старшыня РДГА "Беларускае таварыства "Веды".

Тэматыка сустрэч - стратэгія будучыні. Як адзначыў Вадзім Гігін, шмат гаворыцца пра гісторыю, на слыху палітычны парадак дня сённяшняга. Акцыя нацэлена на абмеркаванне арыенціраў на будучыню. "Мы ўступілі ў пяцігодку якасці. Якой будзе наша Беларусь праз пяць гадоў? Якія нашы мары, якія мы ставім мэты - дзяржава, грамадства, кожны чалавек асобна, прадпрыемствы? Яны павінны ў прынцыповых момантах супадаць, - адзначыў спікер. - Мы павінны абазначаць выклікі і пагрозы. Ні ў якім разе не расслабляцца, усведамляць свае рэзервы, рэсурсы, якія, можа, недзе не выкарыстаны, для таго, каб упэўнена рухацца наперад. Наша сённяшняя размова - якраз сумленная размова пра вобраз будучай Беларусі".

Геаграфія акцыі ахопіць усе рэгіёны і закончыцца 12 верасня. Па выніках будуць зроблены высновы. "Мы не толькі адказваем на пытанні аўдыторыі, але гэта і пэўны агляд нашых палітычных актывістаў, нашай ідэалагічнай вертыкалі. Якія настроі ў людзей? Якія пытанні хвалююць? Абавязкова ўсё прааналізуем", - дадаў Вадзім Гігін.

Ён звярнуў увагу, што ў рэгіёнах рыхтуюцца да правядзення акцыі, яе чакаюць. Вопыт "Марафону адзінства" паказаў, што ў Беларусі могуць працаваць не проста сучаснымі метадамі, а нават недзе дзейнічаць на апярэджанне. "Такі вопыт важна маштабаваць, развіваць", - лічыць старшыня праўлення РДГА "Беларускае таварыства "Веды".

Старшыня Барысаўскага раённага выканаўчага камітэта Мікалай Карповіч адзначыў, што для Барысаўскага раёна ганарова першым прымаць акцыю "Беларусь адзіная". "Рады, што яна пачынаецца менавіта тут, і ўпэўнены, што пройдзе на самым высокім узроўні", - сказаў ён, дадаўшы, што трэба ведаць, што хвалюе людзей, і зыходзячы з гэтага вырашаць задачы па развіцці рэгіёнаў.