29 жніўня 2024, 11:13

"Студэнт адпрацаваў на пасяўной - купіў машыну". Рэальныя гісторыі сучасных аграрыяў ад "дэкана з ЦікТока"

Уладзімір Гусараў. Скрыншот відэа

29 жніўня, Мінск /Кар. БЕЛТА/. Дэкан факультэта механізацыі сельскай гаспадаркі Беларускай дзяржаўнай сельскагаспадарчай акадэміі (БДСГА) Уладзімір Гусараў не тэарэтык. Шмат гадоў запар ён мяняў аўдыторыю на поле, дзелавы касцюм - на рабочы камбінезон і адпраўляўся на ўборачную. Робячы ўсё "па падручніку", паказваў такія вынікі, што вопытныя камбайнеры прасілі: "Навучы!" Студэнты ж прызнавалі: "А наш выкладчык можа!"

Уладзімір Уладзіміравіч упершыню трапіў на ўборачную памочнікам камбайнера ў 17 гадоў і ўлюбіўся ў працу хлебаробаў. Да гэтага часу ўспамінае пах поля, на якім працуе тэхніка, - яго ні з чым не зблытаеш. "Гэты пах вельмі своеасаблівы, класны. Я ў першую гарачую пару ўжо зразумеў, што ўбіраць хлеб - праца цяжкая, але высакародная. Выгрузіў першы бункер збожжа - твая сям'я галоднай не застанецца. Выгрузіў другі - накарміў суседскую. Так пакрыху за ўборачную забяспечыў усю вёску. Гэта ж вялікая справа!" - упэўнены Уладзімір Гусараў.

Ён са шкадаваннем канстатуе: цяпер далёка не ўсе разумеюць цану хлеба. Дэкан тлумачыць гэта так: "Дзяды перажылі пасляваенны голад, бацькі - дэфіцыт у 1990-я. Моладзь усяго гэтага не бачыла. Нашым дзецям проста пашанцавала, што Прэзідэнт у свой час зрабіў акцэнт на развіцці вёскі. Дзякуючы гэтаму сёння мы можам сябе накарміць. Ды і вёска змянілася ў лепшы бок: ёй на змену прыйшлі аграгарадкі, дзе больш жыхароў і лепш інфраструктура. А што было б, калі б такой увагі вёсцы не надавалася?"

Уладзімір Уладзіміравіч не планаваў заставацца ў Беларускай дзяржаўнай сельгасакадэміі пасля яе заканчэння. Быў упэўнены, што адправіцца маладым спецыялістам у Полацкі раён. Аднак прафесар Аляксандр Клачкоў вырашыў інакш. "На размеркаванні заявіў, што пакідае мяне ў акадэміі. Кіраўнік сельгаспрадпрыемства абурыўся, маўляў, забіраеце спецыяліста. Але Аляксандр Віктаравіч паабяцаў: "Замест Гусарава аддам вам траіх выпускнікоў". Таму мяне, лічы, выкупілі", - смяецца Уладзімір Уладзіміравіч.

Да 2018 года, калі стаў дэканам факультэта механізацыі сельскай гаспадаркі, ён удзельнічаў ва ўборачных кампаніях. Двойчы вывеў свой маладзёжны экіпаж у раённыя лідары. Але новы статус прынёс Уладзіміру Гусараву шмат дадатковай работы, таму цяпер знайсці час на ўборачную не атрымліваецца. Выключэнне зрабіў толькі раз - у 2022 годзе. "Сітуацыя была нерадавая. Тэрмін уборкі заканчваўся, а ў гаспадарцы захварэў перадавік. Кіраўнік папрасіў мяне сесці за руль камбайна. Якраз у гэты час нашы хлопцы і дзяўчаты працавалі ў студатрадах на ўборачнай па ўсёй краіне. Напісаў ім у чаце: "Далучаюся!" Яны ўдакладнілі: "З праверкай едзеце?" Калі я прыслаў ім фота з кабіны камбайна "Палессе GS12", здзівіліся: "Дэкан на камбайне? Не можа быць?!" - успамінае Уладзімір Уладзіміравіч.

Сваё рашэнне ён тлумачыць не толькі жаданнем дапамагчы сельгаспрадпрыемству, але і паказаць студэнтам, што можна ўцерці нос нават вопытным камбайнерам, калі выкарыстоўваць тэарэтычныя веды. "У 2022 годзе, у прыватнасці, я так намалаціў амаль 1,5 тыс. т. Студэнты задумаліся: можа, ёсць сэнс слухаць тое, што ў аўдыторыі расказваюць, калі гэта працуе?" - адзначае Уладзімір Гусараў.

Каб прыцягнуць больш увагі моладзі, у БДСГА пачалі папулярызаваць сябе праз сацсеткі. У прыватнасці, праз ЦікТок. "Хлопцы і дзяўчаты, якія прыходзяць вучыцца на мой факультэт, хочуць не толькі страчыць канспекты, але і нешта круціць-вярцець. Таму мы вырашылі разам са студэнтамі аднаўляць тэхніку. Да 2020 года прывялі ў парадак трактар, які стаяў на пастаменце 55 гадоў. У дзень святкавання юбілею акадэміі запусцілі рухавік машыны. Адзін з нашых майстроў запісаў гэты момант на відэа і выклаў у ЦікТок. Яно імгненна набрала 100 тыс. праглядаў. Узялі на заметку, што можна і там папулярызаваць сельгасакадэмію, расказваць аб прафесіі сучаснага інжынера, паказваць нашу матэрыяльна-тэхнічную базу. Некаторыя думаюць, што калі ў нас не сталіца, то і пахваліцца асабліва няма чым. Я ў сваіх відэа разбіваю гэты стэрэатып", - падкрэслівае дэкан.

У відэа ён развенчвае і яшчэ адзін міф - аб безграшоўі аграрнай прафесіі. "Наша моладзь ужо на практыцы зарабляе добрыя грошы. Прыклад: студэнт 2-га курса, які паступіў да нас пасля каледжа, адпрацаваў шэсць тыдняў на пасяўной у Дрыбінскім раёне і купіў аўто. Так, ён адзін засеяў 60 працэнтаў плошчаў гаспадаркі, але ж і атрымаў за гэта нядрэнныя грошы. Я спрабую данесці простую ісціну: калі ты гультай, то любая прафесія для цябе будзе безграшовай. Адкрыйце любую раёнку, там у аб'явах - "Патрабуецца трактарыст, зарплата ад 2 тыс.", "Патрабуюцца даяркі, зарплата ад 2,2 тыс." Гэта дрэнны заработак?" - задае рытарычнае пытанне дэкан.

Уладзімір Гусараў - герой нашага праекта "Беларусы ў кадры". Мы даведаліся ў "дэкана з ЦікТока", чым ён шакіраваў цэлую вёску, як дапамог сельгаспрадпрыемству нечакана для ўсіх падняць ураджай гароху ў два разы і якім учынкам змяніў жыццё 14-гадовага рабацягі.

Кожны тыдзень у газеце "7 дней" і на сайце БЕЛТА мы глядзім на свет вачыма простых беларусаў, якія шчыра любяць сваю справу, сям'ю і краіну. Усе нашы героі ўнікальныя, але іх аб'ядноўвае адно - вернасць сабе і зямлі, дзе яны жывуць.-0-

*Праект створаны за кошт сродкаў мэтавага збору на вытворчасць нацыянальнага кантэнту.

Падпісвайцеся на нас у