24 чэрвеня, Мінск /Кар. БЕЛТА/. У 2019 годзе колькасць абітурыентаў, якія атрымалі на ЦТ па беларускай мове сто балаў, у параўнанні з мінулым годам падвоілася, паведаміў карэспандэнту БЕЛТА дырэктар Рэспубліканскага інстытута кантролю ведаў Юрый Міксюк.
У 2018 годзе на сто балаў тэсціраванне па беларускай мове напісаў 21 чалавек, а ў бягучым - 42. У 2017 годзе найлепшы вынік на гэтым экзамене быў у 35 абітурыентаў, расказаў Юрый Міксюк.
Паводле слоў дырэктара РІКВ, гэта сведчыць аб тым, што тэсціраванне стабільнае і збалансаванае - у ім дастаткова і лёгкіх задач, і складаных. "Тэст дазваляе змераць узровень ведаў як не вельмі добра падрыхтаваных, так і моцных абітурыентаў", - дадаў Юрый Міксюк.
Цэнтралізаванае тэсціраванне ў Беларусі стартавала 11 чэрвеня з ЦТ па беларускай мове. Усяго на ЦТ зарэгістраваліся 76 тыс. 888 чалавек. Яны будуць здаваць 258,3 тыс. тэстаў па вучэбных прадметах. Наступнае ЦТ - па фізіцы - пройдзе 25 чэрвеня.-0-