27 мая, Гродна /Кар. БЕЛТА/. Стэлу Герояў Савецкага Саюза і поўных кавалераў ордэна Славы адкрылі ў 6-й асобнай гвардзейскай механізаванай брыгадзе ў Гродне, перадае карэспандэнт БЕЛТА.
Стэла ўзведзена да 80-годдзя ўтварэння брыгады. На ёй выгравіраваны імёны 141 ваеннаслужачага, Героя Савецкага Саюза, 14 чалавек сталі поўнымі кавалерамі ордэна Славы. Побач на алеі Славы размешчаны бюсты Герояў Савецкага Саюза, а таксама танк - сімвал воінскага злучэння.
"Сёння знакавы для брыгады дзень. Мы адкрываем стэлу Герояў, стэлу, якая была створана па ініцыятыве і за кошт сродкаў афіцэрскага сходу 6-й брыгады. Гэта наша з вамі даніна памяці героям, нашым бацькам, дзядам і прадзедам, якія ў цяжкія часы Вялікай Айчыннай вайны адстаялі свабоду і незалежнасць нашай краіны, падарылі нам мірнае неба над галавой. Сімвалічна, што падзея адбываецца ў Год гістарычнай памяці. Гэта наша з вамі памяць аб тых падзеях страшных, аб людзях, чые справы і ўчынкі будуць жыць у нашых сэрцах вечна", - сказаў у час цырымоніі адкрыцця намеснік міністра абароны Андрэй Жук. Ён выказаў упэўненасць у тым, што калектыў 6-й брыгады як сёння, так і ў далейшым будзе свята шанаваць і прымнажаць традыцыі, закладзеныя героямі-франтавікамі.
"Азнаёміўшыся з гісторыяй 12-га танкавага корпуса, створанага ў 1942 годзе, ацэньваеш подзвіг кожнага салдата, сяржанта, афіцэра, генерала, хто адстойваў нашу зямлю. Асабліва ў танкавых войсках. Паколькі яны прызначаны для ўводу, прарыву і развіцця поспеху, які пяхота, артылерыя, сапёры прабілі для яго. Танк ідзе ў вузкім праходзе, абстрэльваемы з усіх бакоў праціўнікам жорсткім і бязлітасным. Яны былі такімі. На сваіх Т-34 яны прабівалі абарону праціўніка, атрымлівалі раненні, гінулі і здабылі для нас мірнае неба і нашу краіну. Жадаю вам быць дастойнымі сваіх продкаў і не пасароміць іх славу", - адзначыў памочнік Прэзідэнта - інспектар па Гродзенскай вобласці Юрый Караеў.
6-я асобная гвардзейская механізаваная Кіеўска-Берлінская ордэна Леніна, Чырванасцяжная, ордэнаў Суворава і Багдана Хмяльніцкага брыгада была заснавана 25 мая 1942 года. "Мы сёння адзначаем юбілей злучэння Заходняга аператыўнага камандавання, якое дыслацыруецца ў Гродне, мае слаўны баявы шлях. Сёння 6-я брыгада з'яўляецца лепшым злучэннем у войсках ЗАК. Сёння афіцэры, прапаршчыкі і салдаты прадаўжаюць традыцыі сваіх папярэднікаў, якія служылі ў гады Вялікай Айчыннай і пасляваенны час, у гады станаўлення Узброеных Сіл Беларусі. Гэта злучэнне - першае ва Узброеных Сілах Беларусі як самастойнай суверэннай дзяржавы", - расказаў палкоўнік у адстаўцы Святаслаў Васільеў.
З нагоды святкавання 80-годдзя воінскага злучэння сёння прайшла аглядная экскурсія па воінскай часці, у планах - урачысты сход і святочны канцэрт, а таксама ўрачысты прыём. Заўтра з нагоды юбілейнай даты для жыхароў Гродна пройдуць паказальныя выступленні роты ганаровай варты, воінаў-разведчыкаў брыгады, пляц-канцэрт духавых аркестраў, рэканструкцыя бою пад Казельскам.-0-
