1 лютага, Мінск /Кар. БЕЛТА/. Дадзены старт гарадскому конкурсу прафесійнага майстэрства "Сталічны настаўнік - сталічнай адукацыі", удзельнікамі якога сталі 82 педагогі, перадае карэспандэнт БЕЛТА.
Конкурс нацэлены на фарміраванне прафесійных кампетэнцый педагогаў, здольных забяспечыць якаснае абнаўленне сталічнай адукацыі. Настаўнікам прадаставяць магчымасць паўдзельнічаць у адной з васьмі намінацый: "Дзяцінства. Творчасць. Развіццё" для выхавальнікаў дашкольнай адукацыі, "Вакол свету" для настаўнікаў гісторыі і грамадазнаўства, "Калі цябе разумеюць" для настаўнікаў замежнай мовы, "Пачатак пачаткаў" для настаўнікаў пачатковых класаў, "Звычайны цуд" для настаўнікаў хіміі і біялогіі, "Правільнае рашэнне" для настаўнікаў фізікі, матэматыкі і інфарматыкі, "Разумнае. Добрае. Вечнае" для настаўнікаў рускай мовы і літаратуры, а таксама беларускай мовы і літаратуры і "Свая вышыня" для настаўнікаў музыкі, выяўленчага мастацтва, педагогаў па прадмеце "Айчынная і сусветная мастацкая культура" і настаўнікаў фізічнай культуры і здароўя, дапрызыўнай падрыхтоўкі і медыцынскай падрыхтоўкі.
З прывітальным словам да лепшых настаўнікаў сталіцы звярнуўся намеснік старшыні Мінгарвыканкама Арцём Цуран. "Журналісты задавалі мне пытанне, што сабой уяўляе конкурс і якая яго мэта. Я лічу, што кожны педагог, прыходзячы на ўрок, праходзіць сваоеасаблівы конкурс, таму што да ўрока трэба падрыхтавацца, і калі вучань праяўляе цікавасць да прадмета, значыць, конкурс адбыўся. Настаўнік дабіўся мэты, калі вучань выйшаў за рамкі школьнай праграмы. Настаўнік на сваім месцы, калі любоўю да сваёй работы паказаў, наколькі шматгранная яго прафесія. Мы знаходзімся ў зале сярод педагогаў, якія гараць сваёй работай. Дзякуй, што пашыраеце педагагічную і навуковую думку на сваіх месцах. Дзякуючы вам педагогі сталіцы наперадзе педагагічнай грамадскасці ўсёй краіны. Кожны з вас пераможца", - падкрэсліў ён.
На працягу трох тыдняў настаўнікам трэба будзе правесці адкрытыя вучэбныя заняткі па навучальным прадмеце або адукацыйнай галіне, прадставіць планы-канспекты іх правядзення, апісаць вопыт педагагічнай дзейнасці, прайсці тэсціраванне на прадмет навукова-тэарэтычнай, прадметнай і метадычнай падрыхтаванасці, а таксама правесці майстар-класы і паказаць творчыя візіткі. Усё гэта ўваходзіць у конкурсную праграму і будзе ацэнена.
Намеснік старшыні камітэта па адукацыі Мінгарвыканкама Ірына Чарняўская адзначыла, што мерапрыемства праходзіць ва ўрачыстай і дзіўна вясёлай абстаноўцы. Прычына тоіцца ў тым, што конкурс упершыню за тры гады праходзіць не ў дыстанцыйным фармаце. "Вы бачыце, як гараць вочы педагогаў. Яны старанна рыхтаваліся да конкурсу. Мы доўга не бачылі адзін аднаго. Так, педагогі давалі адкрытыя ўрокі, выконвалі розныя работы ў рамках конкурсу, але ўсё гэта было дыстанцыйна, таму калі ўсе сустрэліся сёння, гэта, вядома, радасна", - падкрэсліла Ірына Чарняўская.
Настаўнікі выступілі перад гасцямі мерапрыемства з тэмай "Сучасны ўрок / заняткі: ідэі, адкрыцці, рашэнні" ў фармаце прэзентацыі "Печа-куча".
Настаўнік інфарматыкі сярэдняй школы нумар 154 Міхаіл Ігнатовіч у конкурсе ўдзельнічае ўпершыню, але поўны рашучасці дастойна прадставіць родную школу і Маскоўскі раён сталіцы. "Падрыхтоўка ідзе хвалююча, але спадзяюся, што на першым гарадскім выпрабаванні "Печа-куча" дастойна прадстаўлю Маскоўскі раён",- расказаў малады настаўнік. Ён упэўнены, што конкурс неабходны для павышэння прафесійнага майстэрства любога настаўніка. "Кожны дзень мы прыходзім на ўрок і даём яго як адкрыты, але той вопыт, які мы атрымаем на гарадскім конкурсе, дзякуючы абмену меркаваннямі з калегамі зробіць нашу работу яшчэ больш эфектыўнай", - дадаў Міхаіл Ігнатовіч.
Настаўнік гісторыі сярэдняй школы нумар 148 Людміла Руцкая - вопытны ўдзельнік. У мінулым годзе яна прымала ўдзел у конкурсе "Акадэмія ўрока", у гэтым годзе вырашыла паспрабаваць сілы ў конкурсе "Сталічны настаўнік - сталічнай адукацыі". "Я лічу, што такія конкурсы дапамагаюць настаўніку прафесійна расці, таму што мы вучымся ў сваіх калег", - падзялілася меркаваннем яна.
Заснавальнік конкурснага мерапрыемства - камітэт па адукацыі Мінгарвыканкама пры падтрымцы Мінскай гарадской арганізацыі Беларускага прафсаюза работнікаў адукацыі і навукі. Непасрэдным арганізатарам конкурсу выступае Мінскі гарадскі інстытут развіцця адукацыі. Пераможцы конкурсу "Сталічны настаўнік - сталічнай адукацыі" ў кожнай намінацыі прадставяць Мінск на рэспубліканскім конкурсе прафмайстэрства педагогаў "Настаўнік года Рэспублікі Беларусь" у верасні.-0-
