Спрэчныя пытанні зняты. Чаму ў Беларусі выключылі дыстанцыйнае навучанне ў замежных школах

Кансультант упраўлення агульнай сярэдняй адукацыі Міністэрства адукацыі Анжэла Кудаярава адзначыла, што ў сістэме агульнай сярэдняй адукацыі Беларусі няма такога паняцця, як "анлайн-навучанне" або "дыстанцыйнае навучанне". Гэта значыць, навучэнцы ўстановы агульнай сярэдняй адукацыі павінны вучыцца менавіта ў гэтай установе.

"З 1 верасня змяненнямі да Кодэкса аб адукацыі будзе ўрэгулявана, што дзеці, якія пражываюць на тэрыторыі Рэспублікі Беларусь, павінны навучацца ва ўстановах адукацыі нашай краіны. Але калі дзеці ад'язджаюць разам з бацькамі ў камандзіроўку на год і больш, то яны вучацца ва ўстановах адукацыі той краіны, дзе яны будуць пражываць", - расказала яна.

Калі дзіця, напрыклад, паехала ў Расію, то яно павінна навучацца ў мясцовай школе, а пасля вяртання, калі яно грамадзянін Беларусі, - можа быць залічана ў беларускую школу і прадоўжыць навучанне. "Мы вывучаем адпаведнасць вучэбных праграм", - растлумачыла Анжэла Кудаярава, дадаўшы, што ў замежных школах дыстанцыйна дзіця не вывучае ні беларускую мову, ні беларускую літаратуру, ні гісторыю Беларусі.

Паводле яе слоў, дзіця, якое навучалася за межамі краіны, можа вярнуцца і здаваць экзамены за 9-11-я класы. "Яно адлічваецца з нашай установы адукацыі, па пэўнай прычыне, напрыклад, бацькі паехалі працаваць, атрымлівае дакументы. Вяртаецца назад, залічваецца ва ўстанову адукацыі і як грамадзянін Рэспублікі Беларусь здае экзамены. Тут нічога не мяняецца", - адзначыла Анжэла Кудаярава.

Галоўны спецыяліст аддзела дашкольнай, агульнай сярэдняй, прафесійна-тэхнічнай і сярэдняй спецыяльнай адукацыі галоўнага ўпраўлення па адукацыі Мінскага аблвыканкама Наталля Дудкіна падкрэсліла, што ўзнікала шмат спрэчных пытанняў у гэтым напрамку, асабліва калі ідзе размова аб законных прадстаўніках. "Ёсць такія законныя прадстаўнікі, якія кажуць: маё дзіця навучаецца дома дыстанцыйна, яно ў школу не ходзіць. А потым мы прыходзім да здачы экзаменаў за 9-ы ці 11-ы клас, а ў дзіцяці не можам нават паглядзець праграму, якую яно вывучала. Гэта значыць, тая школа не можа прадаставіць у поўным аб'ёме дакументы ў адпаведнасці з заканадаўствам Рэспублікі Беларусь, каб дзіця дапусціць да атэстацыі, напрыклад. А цяпер гэтыя пытанні зняты. Законнаму прадстаўніку нічога не застаецца, не трэба нічога прыдумляць і дадумваць", - прывяла прыклад яна.

Гэтыя пытанні датычацца тых бацькоў, дзеці якіх жывуць у Беларусі, але школу не наведваюць.

*Праект створаны за кошт сродкаў мэтавага збору на вытворчасць нацыянальнага кантэнту.-0-