Фота з архіва
29 студзеня, Мінск /Кар. БЕЛТА/. Старшыня Мінгарвыканкама Уладзімір Кухараў падзякаваў усім жыхарам Мінска, гарадскім службам, арганізацыям і прадпрыемствам за дапамогу ва ўборцы снегу. Аб'яднаўшыся традыцыйнай беларускай талакой, усе правялі вялікую работу ў самыя кароткія тэрміны, заявіў кіраўнік Мінгарвыканкама журналістам па выніках даклада Прэзідэнту Беларусі Аляксандру Лукашэнку, перадае карэспандэнт БЕЛТА.
Размова ў час даклада ішла ў тым ліку аб сітуацыі ў жыллёва-камунальнай гаспадарцы і рабоце гарадскіх камунальных службаў у перыяды моцных снегападаў.
"Спрацавалі зладжана, у самыя кароткія тэрміны горад быў расчышчаны ад снегу", - ацаніў вынікі праведзенай работы кіраўнік Мінгарвыканкама.
Паводле яго слоў, першапачаткова было відавочна, што толькі намаганнямі службаў ЖКГ расчысціць горад ад снегу будзе складана. Таму стараліся актыўна задзейнічаць усіх, заклікалі далучыцца да ўборкі снегу з дапамогай сродкаў масавай інфармацыі.
Акрамя таго, загадзя быў адпрацаваны алгарытм па прыцягненні арганізацый Мінска для аказання дапамогі службам ЖКГ тэхнікай, людзьмі. "Трэба аддаць належнае. Вялікі дзякуй арганізацыям Мінска розных форм уласнасці: гандлёвыя прадпрыемствы, прамысловыя, ведамаснай падпарадкаванасці - вельмі адказна паставіліся і забяспечылі ўборку на прылеглых тэрыторыях, аказалі дапамогу камунальным службам, іх тэхніка дапамагала нам вельмі", - падкрэсліў Уладзімір Кухараў.
"Вельмі ўдзячныя і жыхарам Мінска, якія вельмі адказна паставіліся да ачысткі дваровых тэрыторый, асабліва тэрыторый, прылеглых да аўтамабіляў. Гэта самая цяжкая работа. Калі кожны расчысціў тэрыторыю вакол аўтамабіля, гэта дае магчымасць потым прайсці тэхніцы, убраць, вывезці снег з дваровых тэрыторый. На працягу літаральна некалькіх дзён гэта работа была праведзена", - прадоўжыў ён.
Словы ўдзячнасці ён адрасаваў і валанцёрам, якія аказвалі дапамогу сацыяльным установам, дапамагалі дзіцячым садам і школам, а таксама падзякаваў настаўнікам і старшакласнікам.
Паводле яго слоў, сумеснымі намаганнямі ўдалося расчысціць сталіцу ад снегу "даволі хуткімі тэмпамі".
"Мы разумеем, што перад нейкімі стыхійнымі праблемамі трэба збірацца разам, як гэта было заўсёды. Гэта закладзена генетычна ў беларускага народа - талакой прыйсці, усім разам, у самыя кароткія тэрміны стварыць сабе камфортныя ўмовы для пражывання і працы", - падкрэсліў Уладзімір Кухараў.
Ён звярнуў увагу, што ў бліжэйшы час прагназуецца ўзмацненне маразоў. Таму ў полі зроку гарадскіх улад пастаянна знаходзіцца работа энергасістэмы. Праведзена неабходная падрыхтоўка арганізацый, якія пастаўляюць энергію, ЦЭЦ, цеплавузлоў. "Мы зрабілі ўсё для таго, каб, нягледзячы на моцныя маразы, жыхары былі забяспечаны ў поўным аб'ёме цяплом і гарачым водазабеспячэннем", - падкрэсліў Уладзімір Кухараў.-0-
Падпісвайцеся на нас у
