30 снежня, Гомель /Кар. БЕЛТА/. Спецаўтамабіль перадалі Гомельскаму абласному дому дзіцяці для дзяцей з пашкоджаннем цэнтральнай нервовай сістэмы і парушэннем псіхікі 29 снежня ў час акцыі "Нашы дзеці". Такая дапамога стала магчымай дзякуючы ўзаемадзеянню органаў улады, абласной арганізацыі Беларускага Чырвонага Крыжа, спонсараў, паведамляе карэспандэнт БЕЛТА.
Паводле слоў галоўнага ўрача ўстановы Алены Шчарбіцкай, будучыня дзяцей з асаблівасцямі развіцця цалкам залежыць ад дарослых, ад разумення патрэбнасцей асаблівых дзяцей. "І тое, што мы атрымалі да Новага года такі падарунак, - неацэнна і вельмі важна. Вялікая ўдзячнасць усім", - сказала яна.
Алена Шчарбіцкая расказала, што з 1 ліпеня на базе ўстановы функцыянуе абласны цэнтр паліятыўнай медыцынскай дапамогі дзецям. У яго складзе - 20 ложкаў аддзялення стацыянарнай паліятыўнай медыцынскай дапамогі і кабінет для амбулаторнай паліятыўнай дапамогі з выязной патранажнай службай.
"Наша ўстанова курыруе ўсіх дзяцей, якім аказваецца паліятыўная медыцынская дапамога ў вобласці. І маючы такі аўтамабіль, аснашчаны неабходным абсталяваннем, мы зможам яшчэ больш эфектыўна выконваць пастаўленыя перад намі задачы", - дадала галоўны ўрач.
Спецаўтамабіль аснашчаны электрапад'ёмнікам, абсталявана месца для транспарціроўкі дзіцяці ў становішчы лежачы. Прадугледжаны разеткі для падключэння неабходнага абсталявання, бо часта дзецям патрэбна штучная вентыляцыя лёгкіх, санацыя бранхіяльнага дрэва.
На гэты момант ва ўстанове знаходзяцца 37 хлопчыкаў і дзяўчынак. З іх 17 дзяцей з цяжкімі захворваннямі і атрымліваюць стацыянарную паліятыўную медыцынскую дапамогу. Усяго ў Гомельскай вобласці паліятыўная меддапамога аказваецца 224 дзецям.
Як падкрэсліў намеснік старшыні аблвыканкама Дзмітрый Алейнікаў, дабрачынная акцыя "Нашы дзеці" даўно стала сімвалам сапраўднай бескарыслівай любові і клопату пра самае каштоўнае ў жыцці - дзяцей. "Акцыя дае нам усім яшчэ адну магчымасць рэалізаваць іх мары, запаветныя жаданні", - удакладніў ён.
Намеснік старшыні адзначыў, што дзеці ў абласным доме дзіцяці патрабуюць асаблівага клопату і ўвагі. "На шчасце, побач з імі неабыякавыя, добрыя людзі, вопытныя педагогі, спагадлівыя выхавальнікі, прафесійныя псіхолагі, якія даюць апору ў жыцці, дзеляцца часцінкай сваёй душы", - сказаў ён.
Член Пастаяннай камісіі па адукацыі, навуцы, культуры і сацыяльным развіцці Савета Рэспублікі, старшыня Гомельскай абласной арганізацыі Беларускага Чырвонага Крыжа Ала Смаляк дадала, што сярод асноўных задач БЧК - несці клопат, дапамогу, дабро дзецям, дарослым, якія маюць патрэбу ў падтрымцы. "Для ўстановы такі транспарт вельмі неабходны. Бо дзецям, якія тут выхоўваюцца, патрэбна транспарціроўка ў розныя лячэбныя ўстановы", - сказала яна. Паводле слоў кіраўніка, да добрай справы падключыліся ўсе пярвічныя арганізацыі БЧК у рэгіёне.
Акрамя таго, сертыфікат на Br3 тыс. для ўмацавання матэрыяльна-тэхнічнай базы перадала ўстанове старшыня абласной арганізацыі Беларускага прафсаюза работнікаў аховы здароўя Надзея Зіміна.
У знак удзячнасці гасцям выхаванцы і работнікі дома дзіцяці падрыхтавалі і парадавалі творчымі навагоднімі нумарамі.
Рэспубліканская дабрачынная акцыя "Нашы дзеці" праходзіць у Беларусі з 15 снежня па 15 студзеня. У гэты час ва ўсіх рэгіёнах краіны арганізуюцца навагоднія паказы. Кіраўнікі рэспубліканскіх органаў дзяржкіравання, прадстаўнікі мясцовай улады наведваюць дзіцячыя інтэрнатныя ўстановы і дамы сямейнага тыпу, бальніцы, апякунскія і прыёмныя сем'і, віншуюць дзяцей з Новым годам, Калядамі, уручаюць падарункі, дапамагаюць у вырашэнні існуючых пытанняў. Да дабрачыннай акцыі далучаюцца грамадскія аб'яднанні і іншыя арганізацыі.-0-
