2 лістапада, Мінск /Кар. БЕЛТА/. У Следчым камітэце Беларусі адбылася рабочая сустрэча са старшынёй Следчага камітэта Расіі Аляксандрам Бастрыкіным. Аб гэтым БЕЛТА паведамілі ў СК.
Вітаючы расійскіх калег, першы намеснік старшыні СК Беларусі Алег Шандаровіч адзначыў даверны і ўзаемавыгадны характар партнёрскіх адносін паміж двума ведамствамі.
Асноўнай тэмай сустрэчы сталі актуальныя пытанні расследавання розных злачынстваў, асабліва экстрэмісцкай накіраванасці і ў сферы высокіх тэхналогій, абароны правоў і законных інтарэсаў пацярпелых ад злачынных замахаў.
У сувязі са значным ростам у Беларусі колькасці злачынстваў супраць камп'ютарнай бяспекі беларускім бокам выказана зацікаўленасць у азнаямленні з дзейнасцю нядаўна створанага ў СК Расіі аддзела па расследаванні кіберзлачынстваў і злачынстваў у сферы высокіх тэхналогій.
"Дасягнута дамоўленасць аб узаемным абмене навукова-метадычнымі і іншымі матэрыяламі, якія датычацца спецыфікі дасудовага крымінальнага вядзення па крымінальных справах, звязаных з экстрэмізмам, а таксама вывучэнні існуючага станоўчага вопыту і практыкі расследавання злачынстваў, якія ажыццяўляюцца ў віртуальнай прасторы", - расказалі ў ведамстве.
У ходзе сустрэчы бакі таксама абмеркавалі перспектывы далейшага двухбаковага супрацоўніцтва ў рамках дзеючых міждзяржаўных дагавораў у галіне барацьбы са злачыннасцю і заключаных міжведамасных пагадненняў.-0-
