Анатоль Сівак
21 кастрычніка, Мінск /Кар. БЕЛТА/. Пытанне транспартных зносін паміж Мінскам і гарадамі-спадарожнікамі павінна быць вырашана ў наступнай пяцігодцы. Аб гэтым заявіў журналістам намеснік прэм'ер-міністра Анатоль Сівак па выніках даклада Прэзідэнту Беларусі Аляксандру Лукашэнку аб развіцці сеткі рэспубліканскіх аўтамабільных дарог і фарміраванні транспартнай інфраструктуры, якая забяспечвае гадзінную даступнасць да гарадоў-спадарожнікаў, перадае карэспандэнт БЕЛТА.
Развіццё зносін паміж сталіцай і гарадамі-спадарожнікамі вядзецца ўжо на працягу некаторага часу, але, паводле слоў віцэ-прэм'ера, гэта пытанне некалькі гадоў "не ў тым тэмпе развівалася". "Таму гэта пытанне ў наступнай пяцігодцы павінна быць вырашана. Яго зноў узнялі і вядзём адпаведныя разлікі", - сказаў Анатоль Сівак.
Паводле яго слоў, цяпер стаіць задача "актывізаваць работу па дастаўцы насельніцтва ў Мінск або з Мінска ў гарады-спадарожнікі". На дакладзе ў кіраўніка дзяржавы абмяркоўвалася як тэматыка чыгуначных зносін з гарадамі-спадарожнікамі, так і аўтамабільных. "Дадзены пэўныя даручэнні, павінны быць яшчэ ўдакладнены разлікі, і да канца года мы выйдзем на задачы, якія трапяць у праграму ("Дарогі Беларусі". - Заўвага БЕЛТА) на наступную пяцігодку з тэрмінамі, аб'ёмамі і крыніцамі фінансавання", - сказаў Анатоль Сівак.
Як растлумачыў міністр транспарту і камунікацый Аляксей Ляхновіч, задача па даступнасці для насельніцтва гарадоў-спадарожнікаў, якая ставілася на бягучую пяцігодку, выканана: 59 хвілін (з запатрабаваных 60) ідзе на самы доўгі маршрут - да Рудзенска. Па чыгунцы лічбы значна меншыя - ад 30 да 50 хвілін. Паводле яго слоў, ёсць даручэнні кіраўніка дзяржавы, як у далейшым развіваць зносіны сталіцы з гарадамі-спадарожнікамі, уключаючы варыянты запуску трамвая або арганізацыі наземнага метро. Яны будуць дадаткова прапрацаваны і падлічаны.-0-
Падпісвайцеся на нас у
