27 красавіка, Масква /Эдуард Півавар - БЕЛТА/. Нягледзячы на аказаны на Беларусь і Расію беспрэцэдэнтны націск, супрацоўніцтва генеральных пракуратур дзвюх краін застаецца надзейным. Аб гэтым заявіў генеральны пракурор Беларусі Андрэй Швед сёння ў Маскве на пасяджэнні Аб'яднанай калегіі генпракуратур Беларусі і РФ, перадае карэспандэнт БЕЛТА.
"Аб'яднаная калегія нашых пракуратур больш за 10 гадоў з'яўляецца ўнікальнай формай не толькі абмеркавання актуальных пытанняў, забеспячэння законнасці ў нашых краінах, - сказаў Андрэй Швед. - Асабліва каштоўна, што, нягледзячы на аказаны беспрэцэдэнтны націск, спробы дыскрэдытацыі нашых дзяржаў і скажэння значных для братэрскіх народаў гістарычных падзей, наша супрацоўніцтва застаецца безумоўным і надзейным".
Ён канстатаваў, што ўзаемадзеянне генеральных пракуратур Беларусі і Расіі развіваецца ўсебакова і дынамічна. "Асаблівая роля генеральных пракуратур неаднаразова адзначалася кіраўнікамі Рэспублікі Беларусь і Расійскай Федэрацыі, - сказаў Андрэй Швед. - Наглядныя ведамствы знаходзяцца на вастрыі сілавога блока, каардынуюць праваахоўную дзейнасць і барацьбу з карупцыяй, вырашаюць жыццёва важныя задачы па абароне правоў і дзяржавы".
Тэмай сённяшняга пасяджэння стала арганізацыя ўзаемадзеяння праваахоўных органаў Беларусі і Расіі па папярэджанні, выяўленні, спыненні і расследаванні злачынстваў, звязаных з замахамі на бяспеку ў сферы выкарыстання інфармацыйна-камунікацыйных тэхналогій. "Належнае процідзеянне злачынствам у сферы інфармацыйна-камунікацыйных тэхналогій і іх раскрыццё немагчымы без цеснага міжнароднага ўзаемадзеяння, абмену перадавым прафесійным вопытам, аператыўнага накіравання і выканання просьбаў аб аказанні прававой дапамогі, - падкрэсліў генеральны пракурор. - Упэўнены, мы захаваем існуючыя добрыя традыцыі ўзаемадзеяння нашых ведамстваў".-0-