9 мая, Мінск /Кар. БЕЛТА/. Нашы продкі атрымалі вялізнай цаной не проста Перамогу, а далі права ўсім нам жыць. Аб гэтым заявіў генеральны пракурор Андрэй Швед, які прыняў удзел ва ўрачыстай цырымоніі ўскладання кветак і вянкоў да манумента Перамогі ў Мінску, перадае карэспандэнт БЕЛТА.
"Чым больш праходзіць гадоў, тым больш мы ўсе, людзі разважлівыя, разумеем, што нашы продкі атрымалі вялізнай цаной не проста Перамогу, а далі права ўсім нам жыць, - сказаў Андрэй Швед. - Вядома, пачуцці перапаўняюць. Па-першае, свята вялізнае для мяне, для ўсіх маіх родных, блізкіх. І, вядома, смутак адначасова, разумеючы нават праз прызму крымінальнай справы аб генацыдзе, колькі людзей загублена, колькі ляжыць у нашай зямлі і колькі нам яшчэ давядзецца даведвацца пра тыя злачынствы, якія ўчынілі фашысты".
Вайна закранула кожную беларускую сям'ю. "У кожнай сям'і ёсць свая гісторыя. У мяне таксама ваявалі. Мой родны дзядуля Сямён Раманавіч са жніўня 1941 года па 1947 год прайшоў вайну, забіваў немцаў ужо з першых дзён акупацыі. Другі дзед прапаў без вестак. Прызываўся ў ліпені 1941 года. І калі я сам прысутнічаю на раскопках, кожны раз лаўлю сябе на думцы, а раптам знойдзецца і медальён майго дзеда, - падкрэсліў генпракурор. - Такіх гісторый вельмі шмат, я думаю, у кожнай беларускай сям'і. Вядома, мы не маем права здрадзіць (гэтай памяці. - Заўвага БЕЛТА). Як толькі здрадзім - усё гэта паўторыцца".-0-
Падпісвайцеся на нас у
