Сходы, прапіска, камунікацыі. Качанава пра пытанні ад прадстаўнікоў садоўніцкіх таварыстваў

22 красавіка, Жлобін /Кар. БЕЛТА/. Сярод пытанняў, з якімі звяртаюцца прадстаўнікі садоўніцкіх таварыстваў (СТ), - правядзенне сходаў для прыняцця рашэнняў, эфектыўнасць дзейнасці кіруючага складу СТ, прапіска, функцыянаванне інжынерных камунікацый. Аб гэтым расказала старшыня Савета Рэспублікі Наталля Качанава на выязным пасяджэнні Савета па ўзаемадзеянні органаў мясцовага самакіравання пры Савеце Рэспублікі, якое праходзіць у Жлобінскім раёне, перадае карэспандэнт БЕЛТА.

Як падкрэсліла Наталля Качанава, пытанні, вынесеныя на парадак дня, актуальныя і зыходзяць з тых прапаноў і зваротаў, з якімі людзі прыходзяць на прыём і якія неабходна ўрэгуляваць.

Адна з тэм пасяджэння - "Аб праблемных пытаннях дзейнасці садоўніцкіх таварыстваў і шляхах іх вырашэння".

"Апошнім часам пачасціліся звароты па пытанні функцыянавання садоўніцкіх таварыстваў. Гэта тэндэнцыя, на жаль, была ў мінулым годзе. І за бягучы год толькі ў Савет Рэспублікі паступіла каля 40 зваротаў аб дзейнасці садоўніцкіх таварыстваў. Хоць у 2023 годзе прыняты Указ Прэзідэнта, у якім ужо ўрэгуляваны хвалюючыя нашых грамадзян пытанні па названай тэме", - звярнула ўвагу спікер.

Яна прывяла такія даныя: у краіне 4728 садоўніцкіх таварыстваў. "Гэта тыя землі і будынкі, якія павінны захоўвацца ў парадку", - падкрэсліла старшыня Савета Рэспублікі.

Гаворачы аб тым, якія пытанні па тэме садоўніцкіх таварыстваў выходзяць на першы план, Наталля Качанава адзначыла: перш за ўсё, гэта правядзенне сходаў. З-за вялікай колькасці членаў садоўніцкага таварыства складана сабраць кворум і прыняць рашэнне, канкрэтызавала яна.

"Другое пытанне - гэта выбранне старшыні, кіруючага складу таварыстваў. Многія гавораць пра іх неэфектыўную работу. Таму мы павінны яшчэ раз вярнуцца да гэтай тэмы. І мясцовыя органы ўлады павінны ўключацца ў вырашэнне пытанняў дзейнасці СТ, калі не атрымліваецца вырашыць гэта пытанне ў самім таварыстве", - звярнула ўвагу Наталля Качанава.

Таксама, паводле яе слоў, гучаць ад людзей і пытанні аб прапісцы ў дамах садоўніцкіх таварыстваў.

"Старшыні паведамляюць, што з'яўляецца шмат пустых участкаў, якія павінны ўтрымлівацца ў належным стане. А хто будзе займацца навядзеннем парадку? Дзе ўзяць сродкі на навядзенне парадку на ўчастках, якія пустуюць і занядбаны?"- агучыла пытанні старшынь СТ спікер.

Акрамя таго, уздымаюцца і пытанні функцыянавання інжынерных камунікацый. Энергазабеспячэнне ўчасткаў, водазабеспячэнне, водаадвядзенне, пералічыла Наталля Качанава.

Яна звярнула ўвагу на асаблівую ролю старшынь сельскіх выканаўчых камітэтаў у гэтых пытаннях. "Гэта і ваша работа. Таму што вы першымі сустракаецеся з гэтымі зваротамі, бо, як правіла, садоўніцкія таварыствы ў нас знаходзяцца ў сельскай мясцовасці", - сказала Наталля Качанава.

"У цэлым пытанне няпростае. Пачынаецца сезон, людзі працуюць ужо на дачах. І таварыства - гэта аб'яднанне, дзе па сутнасці жывуць людзі. Таварыствы ўласнікаў дамоў мы ўрэгулявалі. Прыняты ўсе законы. І на прыкладзе такіх таварыстваў уласнікаў давайце паглядзім пытанні, якія выходзяць на парадак дня (адносна садоўніцкіх таварыстваў. - Заўвага БЕЛТА) і якія хвалююць нашых грамадзян", - звярнулася да ўдзельнікаў пасяджэння старшыня Савета Рэспублікі.

Сярод запрошаных на пасяджэнне Савета - члены Савета Рэспублікі, прадстаўнікі міністэрстваў эканомікі, энергетыкі, сельскай гаспадаркі і харчавання, архітэктуры і будаўніцтва, Дзяржаўнага камітэта па маёмасці і мясцовых органаў улады.-0-