14 верасня, Мінск /Кар. БЕЛТА/. Уключэнне моладзі ў працэсы будаўніцтва Саюзнай дзяржавы - гарантыя поспеху, заявіла журналістам кіраўнік прадстаўніцтва Пастаяннага камітэта Саюзнай дзяржавы ў Мінску Мар'яна Шчоткіна, перадае карэспандэнт БЕЛТА.
"Сёння мы адпраўляем беларускую дэлегацыю для ўдзелу ў фестывалі "Моладзь - за Саюзную дзяржаву". Ён праходзіць штогод за кошт сродкаў саюзнага бюджэту. І трэба сказаць, што гэта сапраўды маштабны фестываль, маштабная адукацыйная і творчая з'ява. Але мэта яго - не толькі фарміраванне адзінай культурнай прасторы, не толькі раскрыццё творчых здольнасцей нашай моладзі, не толькі ўмацаванне салідарнасці і дружбы, але і актывізацыя маладзёжнага руху Беларусі і Расіі, выпрацоўка сумесных праектаў і ідэй. І будуць не толькі конкурсы, майстар-класы, канцэрты, але і дыскусійныя пляцоўкі. Упэўнена, што ў выніку гэтага 15-га фестывалю, вядома, будуць прапанаваны новыя ідэі", - сказала Мар'яна Шчоткіна.
Мы цяпер жывём у вельмі складаны час, адзначыла кіраўнік прадстаўніцтва: "Гэта час выклікаў і нам не трэба супакойвацца занадта. Таму што Саюзная дзяржава зведвае вельмі вялікі націск на знешнім контуры. Інтэграцыйныя працэсы залежаць ад уключанасці моладзі ў іх. Таму самы галоўны стратэгічны рэсурс любой дзяржавы, яе развіцця - моладзь. І калі моладзь уключана ў працэсы развіцця, будаўніцтва, станаўлення Саюзнай дзяржавы, то гэта гарантыя поспеху".
Беларуская дэлегацыя сёння адпраўляецца на XV фестываль "Моладзь - за Саюзную дзяржаву". Цырымонія ўрачыстай адпраўкі праходзіць у Маладзёжным тэатры эстрады. Беларускім рэспубліканскім саюзам моладзі праведзена неабходная падрыхтоўчая работа і сфарміраваны склад дэлегацыі ад Беларусі ў колькасці 100 чалавек, у якую ўвайшлі прадстаўнікі ўсіх рэгіёнаў. Гэта студэнты, навучэнцы, маладыя работнікі розных аргнізацый і прадпрыемстваў, аб'яднаныя імкненнем да творчасці і дружбы паміж моладдзю Расіі і Беларусі.
Перад удзельнікамі дэлегацыі гасцінна расчыніў свае дзверы Маладзёжны тэатр эстрады. Тут на ўваходзе ўсіх прыбываючых творчым флэшмобам сустракалі ўдзельнікі ансамбля кафедры харэаграфіі Беларускага дзяржаўнага ўніверсітэта культуры і мастацтваў. У фае тэатра разгарнулася канцэпт-прэзентацыя ўдзельнікаў беларускай дэлегацыі, дзе маладыя людзі змаглі адразу пазнаёміцца і акунуцца ў атмасферу творчасці і дружбы. Сваім музычным прывітаннем падзяліліся ўдзельнікі народнага цымбальнага аркестра "Ліра" Мінскага дзяржаўнага каледжа мастацтваў. Атмасферу прыгажосці і грацыі стварылі ўдзельнікі подыум-школы FashionStyleModels Нацыянальнага цэнтра мастацкай творчасці дзяцей і моладзі Міністэрства адукацыі. У склад дэлегацыі таксама ўключаны шоу-балет "Сенсацыя".
Удзельнікі цырымоніі змаглі сустрэцца з маладымі вакальнымі выканаўцамі, сярод якіх Данііл Мышкавец - уладальнік другой прэміі ХХХ Міжнароднага конкурсу выканаўцаў эстраднай песні "Віцебск-2021", Ягор Кан, Вераніка Цубікава, Даная Шаршавіцкая, Уладзіслаў Дубіцкі, які выступае ў арыгінальным жанры піксельнае шоу, баяніст Павел Шайтанаў. Свае візітныя карткі ўдзельнікам XV фестывалю "Моладзь - за Саюзную дзяржаву" ад Беларусі прэзентавалі пераможцы адборачнага тура конкурсу выканаўцаў маладзёжнай песні. Гэта Вольга Булай, Аліна Бурачэўская, Лізавета Галеева, Мікіта Залеўскі, Андрэй Кот, Ілья Пракаповіч, Карына Ромыш і Маргарыта Шыбаева.
"Маладзёжная палітыка - гэта прыярытэтны напрамак развіцця Саюзнай дзяржавы. І фестываль "Моладзь - за Саюзную дзяржаву" - гэта не адзінае мерапрыемства, якое цяпер рэалізуецца на тэрыторыі нашых краін. Ужо ў Пскове стартавала спартакіяда Саюзнай дзяржавы для дзяцей і юнацтва, 19 верасня адкрыецца тур чарговай спартакіяды ў Гродне для сельскай моладзі. Цяпер праходзяць аздараўленне ў "Жамчужыне" дзеці Саюзнай дзяржавы з рэгіёнаў, якія пацярпелі ад чарнобыльскай аварыі. Цяпер у "Зубраняці" праходзіць грамадзянска-патрыятычная кадэцкая змена "За гонар Айчыны". Такім чынам, мерапрыемстваў вельмі шмат", - дадала Мар'яна Шчоткіна.
Па ініцыятыве Парламенцкага сходу Саюза Беларусі і Расіі з 14 па 19 верасня на тэрыторыі Смаленскай вобласці (Расійская Федэрацыя) адбудзецца XV фестываль "Моладзь - за Саюзную дзяржаву". Гэта маштабны творчы і адукацыйны форум, накіраваны на стварэнне адзінай культурнай прасторы Саюзнай дзяржавы, умацаванне дружбы моладзі Расіі і Беларусі, прапаганду лепшых ідэй у галіне сучаснага маладзёжнага руху і наладжванне супрацоўніцтва паміж маладзёжнымі аб'яднаннямі дзвюх краін, а таксама выяўленне і падтрымку таленавітай моладзі. Мінулы, XIV фестываль адбыўся ў 2019 годзе ў Растове-на-Доне. У сувязі са змякчэннем дзеючых каранавірусных абмежаванняў дэпутаты Парламенцкага сходу прынялі рашэнне аднавіць у 2022 годзе правядзенне маштабнага маладзёжнага форуму.
На працягу фестывальнага тыдня запланаваны ўрачыстае адкрыццё і закрыццё фестывалю, выязныя канцэрты ў гарады Смаленскай вобласці, тэматычныя праграмы для ўдзельнікаў, сустрэчы з ветэранамі вайны і працы, студэнтамі ВНУ, вечары дружбы моладзі Беларусі і Расіі і інш. Яркай падзеяй стане конкурс выканаўцаў маладзёжнай песні, у якім прымуць удзел маладыя людзі ва ўзросце ад 16 да 25 гадоў: салісты, аўтары-выканаўцы, дуэты, ансамблі. Беларусь на конкурсе маладзёжнай песні фестывалю "Моладзь - за Саюзную дзяржаву" прадставяць восем выканаўцаў.-0-
