22 верасня, Мінск /Кар. БЕЛТА/. Польскае кіраўніцтва робіць усё магчымае, каб справакаваць Беларусь і стварыць рэгіянальны канфлікт. Аб гэтым у эфіры "Альфа Радыё" заявіў загадчык аддзела сацыялогіі дзяржаўнага кіравання Інстытута сацыялогіі НАН Мікалай Шчокін, паведамляе БЕЛТА са спасылкай на sb.by.
Сёння ў Дзяржпагранкамітэце паведамілі, што 21 верасня на беларуска-польскай граніцы быў знойдзены збіты іншаземец без прытомнасці, у той час як на сумежным баку польскія сілавікі спакойна назіралі за тым, што адбываецца. Паводле даных ДПК, польскія медыкі абследавалі грамадзяніна Ірака на дзень раней. Аднак, "нягледзячы на цяжкі стан іншаземца, які працягваў ускладняцца, уся дапамога польскіх урачоў абмежавалася выдачай абязбольвальнага прэпарату". Як удакладнілі ў Дзяржпагранкамітэце, у далейшым сілавікі сумежнага боку проста выкінулі чалавека ў такім стане на лініі граніцы з Беларуссю. У нашай краіне мужчыне аказалі медыцынскую дапамогу, ён шпіталізаваны.
"Гестапаўскія метады, якімі сталі карыстацца Польшча і Літва, характарызуюць усю палітыку Еўрапейскага саюза. Гэта доўгайграючая палітыка не проста па падрыве бяспекі Беларусі. Яна нацэлена на правакацыі. Паглядзіце, што робіцца. Польшча аб'яўляе на граніцы з Беларуссю надзвычайнае становішча. На гэту тэрыторыю заходзіць батальён НАТА, які цяпер выконвае функцыі ледзь не пагранвойскаў, што забаронена заканадаўствам любой краіны. Яны падвозяць або прывозяць гэтых бежанцаў і ў літаральным сэнсе выштурхоўваюць іх на нашу тэрыторыю, - адзначыў Мікалай Шчокін. - Не трэба гаварыць аб чалавечнасці, яе там ніколі не было. Гэта польскае кіраўніцтва, злачынная ўлада, якая робіць усё магчымае, каб і нас справакаваць, і стварыць рэгіянальны канфлікт".
Эксперт упэўнены, што надзвычайнае становішча ў Польшчы ўводзілася не толькі каб прасунуць структуру НАТА, але перш за ўсё каб заткнуць рот сваёй грамадзянскай супольнасці і СМІ.
"Паглядзіце, у Польшчы пачынаюць выступаць людзі, яны бачаць праўду! - сказаў Мікалай Шчокін. - Прагноз у мяне несуцяшальны. Мы ўжо бачылі некалькі трупаў на граніцы, іх колькасць будзе павялічвацца".
Гаворачы аб закліках у ААН расследаваць выпадкі смерці бежанцаў на беларуска-польскай граніцы, аналітык задаўся пытаннем - а якое пытанне, звязанае з канфліктам, вырашыла ААН за апошнія гадоў трыццаць?
"Хоць адно было? Не. І не вырашыць. Польшча, як і Прыбалтыка, падпарадкоўваецца толькі Вашынгтону. Яна адыгрывае пэўную ролю "падпальшчыка" ў Еўразіі, каб раскалоць яе папалам. А мы якраз апынуліся на граніцы. Не атрымаўся бліцкрыг у нашай краіне, не выйшаў дзяржаўны пераварот, нічога не атрымалася зрабіць з беларускім народам, а тут яшчэ і адсвяткавалі Дзень народнага адзінства... Што ім застаецца? Толькі правакацыі і ўсялякія хітрасці, якія будуць звязаны з ахвярамі. Тое, што сёння адбылося на граніцы, пацвярджае палітыку Польшчы", - рэзюмаваў Мікалай Шчокін.-0-
