17 студзеня, Мінск /Кар. БЕЛТА/. Бежанцы на граніцы ні разу не праявілі агрэсіі ў адносінах да Чырвонага Крыжа, паведаміў генеральны сакратар Беларускага таварыства Чырвонага Крыжа Дзмітрый Шаўцоў у час перадачы "Па сутнасці" на тэлеканале СТБ, перадае БЕЛТА.
"У першыя дні, калі мы прыехалі, мы ўбачылі банальна галодных людзей, якія хацелі вады і хоць крыху хлеба. Размовы аб тым, што гэта ваяўнічыя людзі, не было ніколі, - сказаў Дзмітрый Шаўцоў. - Вы ведаеце, за ўвесь час, нават калі яны (бежанцы. - Заўвага БЕЛТА) знаходзіліся ў лесе, калі мы прыязджалі раз у дзень, каб даць ім прадуктовыя наборы, яны ні разу не праявілі ніякай не тое што фізічнай, але нават спробы або жэсту агрэсіі ў бок Чырвонага Крыжа. Пагранічнікі хадзілі толькі ў форме, яны былі без зброі і дапамагалі нам у тым ліку раздаваць прадукты".
Паводле слоў Дзмітрыя Шаўцова, курды па сваім менталітэце нечым нагадваюць беларусаў. "Яны вельмі міралюбныя, спакойныя людзі, якім проста рэальна не было куды ісці", - адзначыў ён.
Генеральны сакратар лічыць, што бежанцы сталі ўсяго толькі падставай для сканцэнтравання побач з граніцай на польскай тэрыторыі ўзброеных людзей. "Зусім не зразумелая была сітуацыя: сядзяць 2 тыс. людзей (бежанцаў. - Заўвага БЕЛТА), з іх амаль 500 маленькіх дзяцей, 500-600 жанчын, яны паляць вогнішчы, а на тым баку цераз калючы дрот ты бачыш сканцэнтраванне войскаў, прычым узброеных. Лятае баявы верталёт, які пастаянна шуміць. Карцінка нават для мяне, дарослага чалавека, была крыху жудаснай", - сказаў Дзмітрый Шаўцоў.
Ён лічыць, што "многія рэчы незразумела з якой мэтай былі зроблены, але толькі не з мэтай стрымлівання мігрантаў, гэта адназначна".
Як адзначыў эксперт у галіне нацыянальнай бяспекі Аляксандр Цішчанка, беларускія пагранічныя сілы паводзяць сябе з годнасцю і ў адпаведнасці з законам. "Але калі з таго боку будуць правакацыі, то, вядома, будзе міжнародная рэакцыя", - сказаў ён.-0-
