2 верасня, Мінск /Кар. БЕЛТА/. Прэм'ер-міністр Раман Галоўчанка ўрачыста адкрыў новы комплекс будынкаў з інтэрнатам Мінскага дзяржаўнага мастацкага каледжа імя А.К. Глебава, перадае карэспандэнт БЕЛТА.
У час урачыстай лінейкі Раман Галоўчанка павіншаваў навучэнцаў з пачаткам новага навучальнага года. Прэм'ер звярнуўся да юнакоў і дзяўчат і адзначыў: "Мы пачынаем новы навучальны год. Я вас горача з гэтым віншую. Разам з вамі такое свята па ўсёй краіне адзначаюць амаль два мільёны школьнікаў і студэнтаў. Ну і, вядома, першакласнікі, якія ўпершыню ў гэтым годзе сядуць за парты. Іх у нас 105 тыс. Першакурснікаў таксама шмат. У каледжы і ВНУ ўпершыню прыйшлі больш за 100 тыс. навучэнцаў".
Перад навучэнцамі каледжа адчыніў свае дзверы новы будынак каледжа. "Прасторнае памяшканне напоўніцца вашымі галасамі, вашымі ўсмешкамі, ну і, вядома ж, той атмасферай творчасці і натхнення, якую вы самі для сябе і ствараеце", - упэўнены прэм'ер.
Дзяржава сапраўды нямала робіць для сферы адукацыі, заўважыў Раман Галоўчанка. "Толькі за апошнія некалькі гадоў пабудавана больш за 60 новых школ і дзіцячых садоў. Сёння сваю работу пачне яшчэ пяць школ і тры дзіцячыя сады на 5,5 тыс. месцаў. Сёння ж адкрываецца новы інтэрнат Беларускага дзяржаўнага ўніверсітэта фізкультуры. Да канца года новы інтэрнат атрымае і БНТУ. Ну і цудоўны падарунак атрымлівае сфера культуры - мы адкрываем цэлы комплекс будынкаў з інтэрнатам Мінскага дзяржаўнага мастацкага каледжа імя Глебава. Пабудаваны ён на тым жа месцы, дзе знаходзіўся з 1947 года. Значыць, слаўная гісторыя каледжа будзе прадоўжана", - з упэўненасцю адзначыў кіраўнік урада.
На будаўніцтва комплексу затрачана звыш Br37 млн бюджэтных сродкаў. Паводле слоў прэм'ера, гэта быў няпросты праект са складанай гісторыяй. "Тым не менш, мы адшукалі магчымасць і аператыўна завяршылі гэты важнейшы для нашай краіны культурны аб'ект. Таму што інвесціруючы сюды, інвесціруючы ў культуру, адукацыю, мы, вядома ж, інвесціруем у будучыню нашай краіны. Гэта вельмі важна", - падкрэсліў прэм'ер.
Будынак абсталяваны светлымі аўдыторыямі, майстэрнямі з сучасным абсталяваннем, спартыўнай, актавай заламі і ўтульным інтэрнатам. "Спадзяюся, што ўсё гэта вас яшчэ раз дадаткова прастымулюе да дасягнення высокіх вынікаў у вучобе. Ваш каледж - гэта адна са знакавых для нашай краіны навучальных устаноў. У яго сценах вучыліся многія з тых людзей, якія сваёй творчасцю праславілі нашу краіну. Спадзяюся, што вы прадоўжыце гэтыя слаўныя традыцыі. Не бойцеся ставіць перад сабой амбіцыйныя мэты. Вас ніхто не будзе абмяжоўваць у вашых творчых пошуках, творчасці, стваральнай працы. Будзьце вернымі сабе і свайму прызванню. Для вас адкрыты свет, і дзякуючы сваім талентам вы зможаце яго пакарыць. Я ў гэта вельмі веру", - даў наказ Раман Галоўчанка.
Прэм'ер-міністр уручыў кіраўніцтву каледжа сертыфікат на камфартабельны мікрааўтобус МАЗ 281040.
Акрамя таго, кіраўнік урада асабіста азнаёміўся з інтэр'ерам новых будынкаў і іх функцыяналам. Так, у навучальным корпусе размешчаны аўдыторыі і майстэрні, кабінеты для выкладчыкаў, харчаблок, гардэробная, спартыўная і актавая залы. У спартыўнай зале навучэнцы і выкладчыкі змогуць гуляць у валейбол, гандбол, баскетбол. Знойдзецца месца і для настольнага тэніса. Актавая зала разлічана на 120-130 месцаў.-0-
Фота Віталя Піваварчыка
Падпісвайцеся на нас у
