26 лютага, Магілёў /Кар. БЕЛТА/. Вызначаць рэзервы для развіцця краіны неабходна з улікам памылак і няўдалых рашэнняў. Такім меркаваннем з журналістамі падзяліўся кіраўнік Адміністрацыі Прэзідэнта Ігар Сергяенка, каменціруючы пасяджэнне Магілёўскага аблвыканкама па выніках сацыяльна-эканамічнага развіцця вобласці за 2020 год, перадае карэспандэнт БЕЛТА.
"Магілёўская вобласць у мінулым годзе спрацавала па многіх параметрах значна лепш, чым у 2019-м. Валавы рэгіянальны прадукт стаў лідарам у рэспубліцы. Значныя змяненні адбыліся ў сферы сельскай гаспадаркі - ураджай вырашчаны, захаваны і ў большым аб'ёме паступіў у засекі Радзімы. Ёсць зрухі і ў сацыяльнай сферы: здалі шэраг сацыяльна значных аб'ектаў аховы здароўя і адукацыі. Нягледзячы на ўсе складанасці, вобласць развівалася, будавала, у тым ліку і жыллё, - адзначыў Ігар Сергяенка. - На пасяджэнні аблвыканкама былі адзначаны пункты росту і на бягучы год. Вызначаць рэзервы развіцця рэгіёнаў і краіны ў цэлым неабходна з улікам памылак і няўдалых рашэнняў. І на пасяджэнні мы правялі сур'ёзны аналітычны разбор гэтых аспектаў".
Пасля ўдзелу ў пасяджэнні Магілёўскага аблвыканкама Ігар Сергяенка наведаў ААТ "Магілёўліфтмаш", дзе азнаёміўся з вытворчасцю, падзяліўся сваімі ўражаннямі аб VI Усебеларускім народным сходзе і адказаў на пытанні работнікаў.
"Сустрэчы па выніках УНС цяпер праводзяцца ва ўсіх рэгіёнах. І іх праводзяць людзі, якія прымалі непасрэдны ўдзел у рабоце Усебеларускага народнага сходу. І трэба не проста расказваць або даводзіць да ведама інфармацыю, але і нацэльваць калектывы на вырашэнне тых ці іншых задач, атрымліваць зваротную рэакцыю і бачыць праблемы, якія хвалююць, і знаходзіць для іх шляхі вырашэння, улічваючы меркаванне грамадзян, - адзначыў Ігар Сергяенка. - Сустрэча паказала, што людзей цікавяць розныя пытанні. Работнікі задавалі пытанні і па далейшай знешнеэканамічнай дзейнасці краіны. Гэта прадпрыемства - прыклад работы з замежнымі партнёрамі, у першую чаргу з Расійскай Федэрацыяй. Значная частка прадукцыі рэалізуецца ў Расію і іншыя краіны СНД. Хвалюе людзей жыллёвая палітыка, якія змяненні будуць у выбарчым заканадаўстве, якая палітыка будзе ў дзяржавы адносна бізнесу. Вельмі разнапланавыя былі пытанні, таму мы пастараліся пабудаваць нашу сустрэчу не ў фармаце лекцыі, а ў форме гутаркі".
Паводле слоў кіраўніка Адміністрацыі Прэзідэнта, ААТ "Магілёўліфтмаш" - унікальнае прадпрыемства. Гэта вядомы беларускі брэнд, такі ж, як МАЗ, БЕЛАЗ, "Камунарка" і шэраг іншых. Гэта адзінае прадпрыемства ў краіне, ды і на постсавецкай прасторы іх адзінкі, якое выпускае самыя розныя мадыфікацыі ліфтаў", - адзначыў Ігар Сергяенка.
Як расказаў генеральны дырэктар ААТ "Магілёўліфтмаш" Сяргей Чарткоў, мінулая пяцігодка прайшла для прадпрыемства паспяхова. "Галоўны вынік мінулай пяцігодкі - гэта стабільная работа прадпрыемства і павелічэнне аб'ёмаў выпуску ў 2,5 раза. Гэта вельмі добры вынік, высокая планка, якую цяпер трэба трымаць, - падкрэсліў генеральны дырэктар. - Паспяхова працавалі на знешніх рынках, добра адпрацавалі беларускую праграму замены ліфтаў, таму задачы на наступную пяцігодку і бягучы год у прыватнасці - толькі прадаўжаць. Падпісаны ўказ Прэзідэнта аб прадаўжэнні работы па замене ліфтаў у Беларусі, пра знешнія рынкі таксама нельга забываць. Наша прадпрыемства экспартна арыентаванае, 70 працэнтаў усёй прадукцыі ідзе на экспарт, таму на нашых асноўных рынках (у Расійскай Федэрацыі, Казахстане) неабходна яшчэ шмат працаваць. Там у нас створана шырокая дылерская сетка, сумесныя прадпрыемствы і зборачныя вытворчасці, таму цана, якасць - усё ёсць, каб пашыраць прадукцыю на знешніх рынках".
За апошні час адным з самых паспяховых кантрактаў для прадпрыемства стаў кантракт з Арменіяй. "Паставілі 500 ліфтаў для замены ў Ерэван, яны ўжо ўсе зманціраваны. І ў бліжэйшы час закажуць яшчэ 300 ліфтаў. Ліфтавы парк там вельмі зношаны, работы яшчэ шмат. Іншыя рынкі - гэта і Азербайджан, і Казахстан, не забываем пра Украіну, будзем павялічваць пастаўкі", - расказаў Сяргей Чарткоў.
Акрамя ліфтаў і спецыялізаванага абсталявання на прадпрыемстве выпускаюць новыя парковачныя сістэмы. "Мы лічым, што за гэтай прадукцыяй будучыня, бо ў вялікіх гарадах, мегаполісах ёсць цяжкасці з парковачнымі месцамі. Таму мы прапануем абсалютна новыя парковачныя сістэмы на розную колькасць месцаў, рознага віду выкананняў. Прадукцыя новая, інавацыйная, яна даволі дарагая, але ўжо цяпер мы пачынаем працаваць з праектнымі арганізацыямі. Нашымі паркоўкамі вельмі зацікавілася дэлегацыя Прыморскага края, яны прапрацоўваюць пытанне, у сакавіку чакаецца іх прыезд зноў. І мы пад іх спецыяльна распрацавалі паркоўку для джыпаў на 10 машына-месцаў. Прадукцыя гэта гатовая, будзем яе дэманстраваць, спадзяёмся на пастаўкі. Гэта будзе першая партыя на экспарт", - расказаў дырэктар.
fff8
Як адзначыў Ігар Сергяенка, у бягучай пяцігодцы асаблівую ўвагу будуць удзяляць развіццю рэгіянальнай палітыкі. "Гэта прадпрыемства - прыклад таго, як неабходна працаваць, развіваць эканоміку краіны і свайго рэгіёна. У праграме сацыяльна-эканамічнага развіцця асаблівае месца адводзіцца рэгіянальнай палітыцы - развіццю абласцей, вялікіх гарадоў, раённых цэнтраў і гарадоў-спадарожнікаў. Пастаўлена задача знаходзіць і рэалізоўваць у кожным раённым цэнтры інвестыцыйныя праекты, якія маглі б стаць драйверамі эканамічнага росту таго ці іншага рэгіёна. Развіццю сеткі мясцовых дарог таксама будзе ўдзелена асаблівая ўвага. Усе буйныя трасы, якія звязваюць абласныя цэнтры са сталіцай, пабудаваны, таму акцэнт будзе зрушаны менавіта на дарогі абласнога значэння. Гэта будзе сур'ёзная і адказная работа ў кожным рэгіёне нашай краіны".-0-
Фота Алега Файніцкага
