27 студзеня, Магілёў /Кар. БЕЛТА/. У аснове сацыяльна-эканамічнай палітыкі Беларусі знаходзяцца інтарэсы звычайных людзей. Такім меркаваннем з карэспандэнтамі падзяліўся кіраўнік Адміністрацыі Прэзідэнта Ігар Сергяенка ў час абласнога сходу дэлегатаў VI Усебеларускага народнага сходу, які прайшоў сёння ў Палацы культуры вобласці ў Магілёве.
"Пасля VI Усебеларускага народнага сходу жыццё беларусаў адназначна зменіцца. Яно стане лепш і якасней. Таму што ў аснову ўсёй сацыяльна-эканамічнай палітыкі нашай краіны пакладзены інтарэс простага чалавека. Гэта пытанні, якія датычацца адукацыі, аховы здароўя, развіцця інтэлектуальных магчымасцей і даходаў. Падрыхтаваная праграма, асноўныя моманты якой былі прэзентаваны сёння, - усёабдымная. І сёння прадстаўнікі цэнтральнага апарату ўлады праінфармавалі прысутных аб асноўных перспектывах развіцця Магілёўскай вобласці і краіны ў цэлым, - адзначыў Ігар Сергяенка. - Гэтаму рэгіёну ёсць чым ганарыцца, поспехі ўсяляюць аптымізм. Магілёўшчына ў апошнія гады дэманструе сур'ёзныя дасягненні і ў эканоміцы, і ў ахове здароўя, сельскай гаспадарцы, ва ўмацаванні матэрыяльна-тэхнічнай базы. Сёння размова ішла і пра захаванне агульначалавечых і гістарычных каштоўнасцей, пра важнасць захавання адзінства ў грамадстве, пра тое, як далей развіваць грамадска-палітычную сістэму нашай краіны. Выступалі людзі розных прафесій: ад кіраўнікоў буйных прадпрыемстваў і дэпутатаў да звычайных працаўнікоў вёскі. Уносіліся канкрэтныя прапановы, якія патрабуюць вырашэння на цэнтральным узроўні, шэраг пытанняў можна вырашыць на ўзроўні рэгіёна і аблвыканкама. У цэлым, у нас атрымалася насычаная, канструктыўная і патрыятычная размова".
Магілёўскую вобласць на маштабным мерапрыемстве будуць прадстаўляць 310 дэлегатаў. "Нягледзячы на тое, што апошні год пяцігодкі выдаўся складаным і часам непрадказальным ва ўмовах сусветнай пандэміі, закрыцця граніц і нявызначанасці ў дынаміцы знешніх рынкаў, асноўныя галіны рэальнага сектара эканомікі Магілёўскай вобласці характарызуюцца станоўчымі тэндэнцыямі, якія далі магчымасць падысці да новай пяцігодкі з памацнелай эканомікай і разуменнем таго, за кошт якіх напрамкаў мы будзем развівацца далей. А па выніках асобна 2020 года Магілёўская вобласць спрацавала з лепшым тэмпам росту сярод усіх рэгіёнаў краіны, - адзначыў у час выступлення намеснік старшыні Магілёўскага аблвыканкама Руслан Страхар. - Літаральна праз два тыдні адбудзецца важная падзея ў жыцця нашай краіны. На працягу доўгага часу ў нас праходзілі дыялогавыя пляцоўкі, дзе абмяркоўваліся розныя ідэі і прапановы для будучага развіцця краіны, якія закранулі ўсе сферы жыцця".
Усяго па выніках дыялогавых пляцовак, якія прайшлі ў Магілёўскай вобласці, у аргкамітэт сходу паступіла 270 прапаноў. "Шэраг з гэтых прапаноў ужо знайшлі сваё адлюстраванне ў праграме сацыяльна-эканамічнага развіцця Беларусі на 2021-2025 гады, праект якой будзе абмяркоўвацца дэлегатамі на Усебеларускім народным сходзе. І наша з вамі агульная задача, каб усе гэтыя механізмы, закладзеныя ў праграме, былі сапраўды рэалізаваны, а не засталіся толькі на паперы", - адзначыў Руслан Страхар.
У час прэзентацыі праекта праграмы сацыяльна-эканамічнага развіцця Беларусі на 2021-2025 гады, міністр эканомікі Беларусі Аляксандр Чарвякоў адзначыў, што работа над новай праграмай заняла больш як два гады. "У распрацоўцы гэтага дакумента прыняло ўдзел больш за 100 профільных экспертаў. Гэта сведчыць аб тым, што работа над дакументам была ўсебаковай і вельмі прадуманай. Праект новай праграмы развіцця - гэта сумесны дакумент бізнесу, навукі і грамадства. І кожны бок унёс свой сур'ёзны ўклад у гэту работу", - падкрэсліў міністр.
Праект праграмы развіцця на наступную пяцігодку складаецца з чатырох асноўных блокаў. Гэта паляпшэнне якасці жыцця насельніцтва, умацаванне эканамічнага патэнцыялу і лічбавая трансфармацыя эканомікі, рэгіянальнае развіццё, стварэнне спрыяльнага рэгулятарнага асяроддзя. "Дзяржава прадоўжыць у будучым захоўваць сваю сацыяльную накіраванасць, дзе галоўная мэта - рост дабрабыту нашых людзей. Асноўная ўвага будзе ўдзелена даходам насельніцтва, цэнам, занятасці, даступнасці жылля. А таксама высокатэхналагічным паслугам у сферы аховы здароўя і адукацыі. У эканамічнай частцы прадоўжым развіваць індустрыяльны патэнцыял прамысловасці і сельскай гаспадаркі на новай тэхналагічнай базе і лічбавай аснове. Яшчэ адным напрамкам работы стане фарміраванне новых высокатэхналагічных галін і прадпрыемстваў, - адзначыў міністр эканомікі. - Вялікая ўвага будзе надавацца развіццю і ўмацаванню рэгіёнаў. Так, у бліжэйшую пяцігодку ў Магілёўскай вобласці плануецца пабудаваць 12 дзіцячых садоў, што створыць каля 2,5 тыс. новых месцаў. Акрамя гэтага, будуць створаны два кластары: біятэхналогій у Горках і IT у Магілёве, удзельнікамі якога стануць прадстаўнікі Беларуска-Расійскага ўніверсітэта і Парка высокіх тэхналогій. У Бабруйску і Асіповічах плануецца стварыць два міжрэгіянальныя медыцынскія профільныя цэнтры".
Як адзначыў начальнік галоўнага ўпраўлення па ахове здароўя Магілёўскага аблвыканкама і дэлегат VI Усебеларускага народнага сходу Аляксандр Старавойтаў, развіццё медыцыны ў Беларусі набрала добрыя абароты і важна, каб гэта работа не спынялася. "За мінулыя гады мы зрабілі шмат для развіцця медыцыны як у нашым рэгіёне, так і ў краіне ў цэлым. У нас ёсць сур'ёзны фундамент для далейшага развіцця гэтай сферы, - адзначыў Аляксандр Старавойтаў. - Мы ўдзяляем шмат увагу прафілактыцы і барацьбе з сардэчна-сасудзістымі захворваннямі і анказахворваннямі. Цяпер пры Магілёўскай абласной клінічнай бальніцы ідзе будаўніцтва кардыяхірургічнага корпуса, тут жа будзе створаны кардыятэрапеўтычны корпус разам з кардыядыспансерам. Ідзе будаўніцтва корпуса прамянёвай тэрапіі пры Магілёўскім абласным анкалагічным дыспансеры. Яшчэ адна важная будоўля, якая ўвайшла ў распараджэнне Прэзідэнта - будаўніцтва інфекцыйнага корпуса пры шматпрофільнай бальніцы нумар 1 у Магілёве. Акрамя гэтага, вядзецца рэканструкцыя многіх устаноў аховы здароўя ў раёнах. Гэта Слаўгарадская, Чэрыкаўская і іншыя бальніцы. Мы бачым вялікую падтрымку з боку дзяржавы, аблвыканкама. Толькі ў мінулым годзе было выдзелена больш за Br600 млн, і на гэты год выдзелена сума не меншая. З кожным годам бюджэт аховы здароўя павялічваецца. І мы рады гэтай рабоце - з'яўляюцца важныя і патрэбныя аб'екты аховы здароўя, павышаецца даступнасць медыцынскіх паслуг".
Паводле слоў міністра працы і сацыяльнай абароны Ірыны Касцевіч, для рэалізацыі ўсіх пастаўленых задач неабходна мадэрнізаваць і сацыяльную сферу. "У цэнтры ўвагі асноўных палажэнняў праграмы сацыяльна-эканамічнага развіцця на 2021-2025 гады - чалавек, узровень і якасць яго жыцця. Чалавеку для шчасця неабходна сям'я, дзеці, работа з дастойнымі ўмовамі працы і заработнай платы. І вядома ж - увага і клопат у старасці. Асноўныя напрамкі ў праграме сацыяльна-эканамічнага развіцця нашай краіны на бліжэйшую пяцігодку вызначаны - гэта ўмацаванне дэмаграфічнага патэнцыялу, садзейнічанне эфектыўнай занятасці, устойлівы рост даходаў, актыўнае даўгалецце і клопат аб старэйшым пакаленні, - падкрэсліла Ірына Касцевіч. - У нашай моладзі змяніліся прыярытэты. Цяпер яна выбірае вучобу, кар'еру, а потым ужо сям'ю. Важна прадаўжаць работу па стварэнні ўмоў для павышэння нараджальнасці ў нашай краіне. Шматдзетныя сем'і для нашай краіны - гэта наш гонар. Мы будзем працаваць над дадатковымі мерамі па стымуляванні да нараджэння другіх і наступных дзяцей. Мы павінны ўдзяліць яшчэ больш увагі нашым маладым сем'ям, забяспечыць дастойные ўмовы для іх жыцця".
Падводзячы вынікі праведзенага сходу, старшыня Магілёўскага аблвыканкама Леанід Заяц адзначыў, што ў Магілёўскай вобласці - сур'ёзныя планы на будучую пяцігодку. "У першую чаргу, важна захаваць адзінства ўсяго грамадства. Калі людзі адзіныя, прасцей вырашаць усе праблемы і пытанні, працаваць на карысць рэгіёна і краіны. Так намнога лягчэй дасягнуць пастаўленых мэт па павышэнні дабрабыту людзей і забеспячэнні эканамічнага росту прадпрыемстваў Магілёўскай вобласці, - падкрэсліў Леанід Заяц. - Мы бачым рэзервы і добры патэнцыял у прамысловасці, сельскай гаспадарцы. Ёсць пэўныя моманты, над якімі трэба папрацаваць - вырашэнне праблемных пытанняў дасць яшчэ адзін штуршок для развіцця рэгіёна ў цэлым. Хочацца адзначыць, што той дакумент, які абмяркоўвалі сёння ў Магілёве, тыя напрамкі, якія выбраны прыярытэтнымі для будучага развіцця Беларусі, людзі аднагалосна падтрымалі. Таму што гэта перспектывы нашай краіны, своеасаблівыя маякі, на якія будуць арыентавацца ў сваёй рабоце грамадзяне ва ўсіх сферах".-0-
