31 сакавіка, Мінск /Кар. БЕЛТА/. Дзяржава гатова дапамагаць установам і працоўным калектывам, якія займаюцца стваральнай працай. Аб гэтым заявіў кіраўнік Адміністрацыі Прэзідэнта Ігар Сергяенка ў час наведвання Рэспубліканскага навукова-практычнага цэнтра трансфузіялогіі і медыцынскіх біятэхналогій, перадае карэспандэнт БЕЛТА.
"Пабыўшы ў вас і бываючы ў іншых калектывах, пераконваешся, што людзі жывуць будучым, не толькі сучасным, - адзначыў Ігар Сергяенка. - Людзі займаюцца стваральнай працай. Яны жывуць, бачаць пэўныя праблемы і вырашаюць іх, не толькі ставяць, але і самі штодзённай працай іх вырашаюць. Вось гэта самае добрае".
У такой сітуацыі і дзяржава заўсёды аказвае дапамогу. У першую чаргу - у фінансаванні праектаў. Адзін з такіх перспектыўных праектаў абмяркоўваўся і сёння. Яго плануецца рэалізаваць на тэрыторыі Беларуска-кітайскага парка "Вялікі камень".
Ігар Сергяенка падкрэсліў, што цэнтр з'яўляецца вядучай галаўной медустановай у сістэме пералівання крыві, вытворчасці прэпаратаў з крыві. Нават ва ўмовах няпростай эпідабстаноўкі мінулага года цэнтр прадаўжаў развівацца і выконваў усе задачы, што стаялі перад ім: наладжана работа з донарамі, не было перабояў з пастаўкамі плазмы і кампанентаў крыві ў медустановы. Акрамя таго, развівалася навука. Адным з першых у свеце беларускі цэнтр стварыў імунную плазму анты-COVID-19 для лячэння хворых на каранавірусную інфекцыю. Толькі ў 2020-м такую дапамогу атрымалі больш за 3,5 тыс. жыхароў.
Больш за 2 тыс. чалавек выступілі донарамі антыкавіднай плазмы, выраблена больш за 4 тыс. данацый. Распрацавана нарматыўная база Міністэрства аховы здароўя, дзе прапісана, як выкарыстоўваць гэту плазму.
"Тыя лічбы і перспектывы, аб якіх мы сёння гаварылі, сведчаць аб тым, што ў цэнтра ёсць будучыня і кіраўніцтва і калектыў будуць рухацца далей, ісці наперад. Як і наша краіна", - прывёў вобразнае параўнанне Ігар Сергяенка. Ёсць, паводле яго слоў, і недахопы, але ў цэлым краіна развіваецца, і аб гэтым ішла размова на Усебеларускім народным сходзе. "Прывяду некалькі лічбаў. Сёння наша краіна ўваходзіць у сусветную пяцёрку экспарцёраў малочнай прадукцыі. Другое: 8,5 працэнта сусветнай вытворчасці калійных угнаенняў - гэта Беларусь. Структура расходаў сям'і змянілася за 20 гадоў карэнным чынам: калі раней 60 працэнтаў складалі расходы на харчаванне, то сёння гэта 30-35 працэнтаў. Гэта значыць, нашы людзі больш увагі ўдзяляюць адпачынку, турызму, медыцыне. На пачатак года ў Беларусі зарэгістравана 3,1 млн аўтамабіляў, - сказаў ён. - Часам мы пра гэтыя рэчы забываем, успрымаем як данасць. Але гэта ж не проста данасць".
У сваю чаргу работнікі РНПЦ звярнуліся да кіраўніка Адміністрацыі Прэзідэнта з просьбай аб садзейнічанні ў забеспячэнні жыллём, асабліва для маладых спецыялістаў. У прыватнасці, абмяркоўвалася магчымасць выдзялення зямельнага ўчастка для будаўніцтва жылля для супрацоўнікаў чатырох медцэнтраў, якія размешчаны паблізу РНПЦ трансфузіялогіі і медыцынскіх біятэхналогій, па аналогіі з тым, як гэта было рэалізавана ў пасёлку Бараўляны. "Са свайго боку я акажу ўсямерную падтрымку", - паабяцаў Ігар Сергяенка.
У час сустрэчы закраналіся таксама пытанні матэрыяльна-тэхнічнага забеспячэння цэнтра, у тым ліку набыццё спецыяльнага аўтамабільнага транспарту для перавозкі крыві і яе кампанентаў, абсталявання для іх нарыхтоўкі і захоўвання.-0-