29 мая, Мінск /Кар. БЕЛТА/. Сельскім жыхарам плануюць дазволіць выкупіць ва ўласнасць арэнднае жыллё, якое патрабуе капрамонту. Праект адпаведнага нарматыўнага прававога акта ўрад унёс на разгляд Прэзідэнта Беларусі Аляксандра Лукашэнкі, перадае карэспандэнт БЕЛТА.
На нарадзе ў кіраўніка дзяржавы прэм'ер-міністр Аляксандр Турчын расказаў перадгісторыю пытання. Каля двух з паловай гадоў таму да яго, калі ён яшчэ быў на пасадзе старшыні аблвыканкама, на прыёме грамадзян звярнулася жанчына, якая пражывала ў арэндным доме. "Арэнднае жыллё - гэта не толькі добраўпарадкаваныя кватэры, але і шмат драўляных дамоў, тэрмін эксплуатацыі якіх вельмі працяглы", - растлумачыў кіраўнік урада.
Грамадзянка звярталася з просьбай выкупіць гэта жыллё ва ўласнасць пры ўмове правядзення капітальнага рамонту і далейшага ў ім пражывання.
"Вы тады падтрымалі гэту прапанову і далі даручэнне выпрацаваць сістэмны дакумент па вырашэнні гэтага пытання. Указам прапануецца дазволіць грамадзянам, якія пражываюць у вёсцы, набываць ва ўласнасць аднакватэрныя дамы, якія маюць патрэбу ў капітальным рамонце, або кватэры ў блочных жылых дамах, эксплуатуемыя больш за 10 гадоў. У цэлым у нас сёння па рэспубліцы налічваецца каля 4 тыс. такіх заселеных дамоў", - сказаў Аляксандр Турчын.
Паводле даных кіраўніка ўрада, на іх аднаўленне і капітальны рамонт патрэбна амаль Br300 млн дзяржаўных сродкаў. "У мэтах скарачэння названых расходаў прапануецца ўстанавіць магчымасць платнай перадачы ва ўласнасць грамадзян такіх жылых дамоў", - заявіў ён.
У якасці часавай адсечкі прапануецца ўстанавіць 1 ліпеня 2025 года - перадаваць ва ўласнасць толькі тыя дамы, якія патрабуюць капітальнага рамонту на гэты тэрмін. Але Прэзідэнт усумніўся ў мэтазгоднасці такой нормы, таму не выключана, што фінальнае рашэнне скарэкціруюць.
"Аплату кошту гэтых дамоў можна будзе праводзіць у растэрміноўку да 3 гадоў роўнымі долямі без індэксацыі плацяжоў. Пры гэтым жылыя дамы, прадастаўленыя грамадзянам на перыяд працоўных адносін, прапануецца перадаваць ва ўласнасць пры наяўнасці бесперапыннага стажу працы не менш за 5 гадоў у арганізацыі, якая прадаставіла такое жыллё. Рашэнне аб перадачы ва ўласнасць жылых дамоў, якія патрабуюць капітальнага рамонту, прапануецца прымаць рай- і гарвыканкамам па ўзгадненні з аблвыканкамамі", - далажыў Аляксандр Турчын.
Паводле яго слоў, істотнай умовай пры перадачы названых жылых дамоў ва ўласнасць будзе з'яўляцца абавязак грамадзян па іх рамонце, а таксама ўзвядзенні новага на ранейшым месцы, калі існуючы дом прызнаны непрыдатным для жылля і падлягае зносу. Будуць таксама прапісаны адпаведныя тэрміны.-0-
Падпісвайцеся на нас у
