14 лістапада, Магілёў /Настасся Гузоўская - БЕЛТА/. На месцах з грамадзянамі трэба працаваць асабіста, а не перадаваць дакументы з кабінета ў кабінет. Аб гэтым у час прыёму грамадзян заявіў памочнік Прэзідэнта - інспектар па Магілёўскай вобласці Міхаіл Русы, перадае карэспандэнт БЕЛТА.
На прыём да памочніка Прэзідэнта запісаліся 18 чалавек. Сярод абазначаных былі пытанні ў сферы ЖКГ, звароты прыватнага парадку. Прадстаўнік жыхароў катэджнай забудовы на вуліцы Першамайскай у аграгарадку Палыкавічы Магілёўскага раёна агучыў калектыўную скаргу на адсутнасць нармальнага асфальтавага пакрыцця. Праблемны ўчастак - 800 м. У будучым годзе тут не запланаваны рамонт дарогі. "Ямы яшчэ неяк зараўноўваюць, але калі пройдзе дождж - немагчыма прайсці", - расказаў мужчына. Міхаіл Русы прапанаваў жыхарам вуліцы Першамайскай і адказным структурам аб'яднацца. "Агульнымі сіламі можна навесці там парадак. Тым больш што жыхары самі гатовы дапамагчы. Неабходна туды з'ездзіць, сабраць жыхароў і пагаварыць. Прапануйце людзям варыянты", - рэзюмаваў памочнік Прэзідэнта.
Жыхарка Магілёва правяла перапланіроўку ў сваім доме, а спецыяліст агенцтва па дзяржаўнай рэгістрацыі і зямельным кадастры пры афармленні дакументаў дапусціла памылку. Агенцтва сваю няслушнасць прызнала і выправіла, прадаставіўшы неабходныя дакументы для рэгістрацыі бясплатна. Каб зарэгістраваць праведзеную рэканструкцыю, жанчыне заставалася толькі прыйсці з заявай у гэта агенцтва і заплаціць невялікую суму. Міхаіл Русы растлумачыў магіляўчанцы, што памылку ўжо выправілі і ёй проста трэба прыйсці з заявай і зарэгістраваць сваю перапланіроўку. Што яна не зрабіла, прадаўжаючы шукаць адказы ў кіраўніцтва вобласці. "Мы павінны займацца глабальнымі і стратэгічнымі пытаннямі, а не разбірацца з неразуменнем людзей. Як толькі адказныя структуры пачнуць канкрэтную работу на месцах і перастануць проста перадаваць скаргі з кабінета ў кабінет, людзі перастануць прыходзіць да нас з такімі праблемамі", - адзначыў ён.
Яшчэ адзін жыхар абласнога цэнтра прыйшоў з просьбай даць магчымасць завяршыць будаўніцтва станцыі тэхнічнага абслугоўвання і аўтамыйкі па вуліцы Пысіна. У 2016 годзе ім з аўкцыёну быў набыты ўчастак для гэтых мэт. Аднак на працягу некалькіх гадоў ніякіх работ не праводзілася - гарадскія ўлады вырашылі канфіскаваць зямлю. Мужчына пастараўся пераканаць прысутных, што работы пачнуцца ў самы бліжэйшы час. "Мы зацікаўлены ў інвестыцыях і стварэнні новых рабочых месцаў. Таму прадаставім вам час. Толькі ўлічвайце, што кантроль будзе на кожным этапе. І кантроль строгі. У выпадку невыканання графіка ўчастак будзе канфіскаваны", - адзначыў Міхаіл Русы.
"Каб вырашыць частку пытанняў, з якімі звярнуліся сёння заяўнікі, трэба было праводзіць работу на месцах, выслухаць чалавека, даступна растлумачыць яму сітуацыю і, калі неабходна, выехаць на месца, паглядзець на праблему самім, асабіста", - рэзюмаваў Міхаіл Русы.-0-
