14 верасня, Мінск /Кар. БЕЛТА/. Міжнацыянальны мір і згода ў нашай краіне маюць прававыя асновы, заявіў сёння журналістам упаўнаважаны па справах рэлігій і нацыянальнасцей Аляксандр Румак у час круглага стала на тэму "Міжнацыянальны мір і згода як аснова адзінства беларускага народа", перадае карэспандэнт БЕЛТА.
"Напярэдадні Дня народнага адзінства мы праводзім круглы стол у Палаце прадстаўнікоў. І я хачу сказаць, што калі мы гаворым аб адзінстве беларускага народа, то мы глядзім на гэта пытанне праз прызму міжнацыянальнага міру і згоды. Мы гаворым аб адзінстве не толькі беларусаў, а ўсіх людзей, якія пражываюць у Рэспубліцы Беларусь. І я хачу адзначыць, што міжнацыянальны мір і згода, якія існуюць у нашай краіне, маюць прававыя асновы. Заканадаўствам Беларусі, у тым ліку ў Канстытуцыі, замацавана роўнасць усіх людзей, незалежна ад нацыянальнасцей", - расказаў Аляксандр Румак.
Гарантуецца права на захаванне сваіх культурных традыцый, на развіццё нацыянальна-культурных адносін у грамадстве. Аказваецца значная дапамога ў распаўсюджванні літаратуры на роднай мове. "Гэта ўсё фінансуецца з бюджэту праз апарат упаўнаважанага па справах рэлігій і нацыянальнасцей. Набываюцца касцюмы для калектываў мастацкай самадзейнасці, таму што прадстаўнікі нацыянальна-культурных аб'яднанняў з'яўляюцца ўдзельнікамі практычна ўсіх мерапрыемстваў, якія праводзяцца як на мясцовым, так і на рэспубліканскім узроўні, - адзначыў упаўнаважаны па справах рэлігій і нацыянальнасцей. - Усяго ў нашай краіне больш за 200 нацыянальна-культурных арганізацый міжнароднага, рэспубліканскага, мясцовага ўзроўняў. І ўсе яны аб'яднаны ў 25 нацыянальна-культурных аб'яднанняў".
Аляксандр Румак падкрэсліў: "Жывучы ў нашай краіне, мы ні разу не чулі аб тым, каб у нас ствараліся нейкія асобныя мікрараёны, вуліцы, дзе пражываюць людзі адной нацыянальнасці. Гэта значыць, кожны чалавек, які па розных прычынах аказаўся ў нашай краіне, асімілюецца і адчувае сябе роўным. На працягу многіх стагоддзяў тут пражывалі людзі розных нацыянальнасцей: рускія, палякі, яўрэі, татары, украінцы. І ўсе яны адчуваюць сябе як дома. І вядома ўжо ў XX і XXI стагоддзі тут знайшлі сабе прытулак людзі, якія беглі ад вайны. Вельмі шмат навучаецца замежных студэнтаў, і яны затым ствараюць сем'і, застаюцца ў нашай краіне і працуюць. Менавіта гэта ўсё і складае міжнацыянальны мір і згоду, аб якіх мы гаворым. Калі чалавек, незалежна ад колеру скуры, валос, прыбываючы на нашу гасцінную зямлю, адчувае сябе нараўне з іншымі", - дадаў ён.
Сёння ў Палаце прадстаўнікоў праходзіць круглы стол на тэму "Міжнацыянальны мір і згода як аснова адзінства беларускага народа". Мерапрыемства праводзіцца напярэдадні святкавання Дня народнага адзінства ў мэтах кансалідацыі беларускага грамадства на аснове ідэй суверэнітэту і незалежнасці краіны, вывучэння правапрымяняльнай практыкі дзеючага заканадаўства ў сферы міжнацыянальных адносін і яго далейшага развіцця.
У мерапрыемстве прымаюць удзел парламентарыі, упаўнаважаны па справах рэлігій і нацыянальнасцей, кіраўнікі буйнейшых дыяспар.
У час работы круглага стала будзе дадзены старт фотафестывалю пад эгідай Палаты прадстаўнікоў для рэспубліканскіх і рэгіянальных СМІ "У кадры - Год народнага адзінства". Лепшыя фота будуць прадстаўлены ў парламенце.-0-
