27 верасня, Мінск /Кар. БЕЛТА/. Як у Саюзнай дзяржаве вырашаюцца злабадзённыя для грамадзян пытанні, расказаў кіраўнік Адміністрацыі Прэзідэнта Беларусі Дзмітрый Крутой у час пасяджэння Групы высокага ўзроўню Савета Міністраў Саюзнай дзяржавы, перадае карэспандэнт БЕЛТА.
"Галоўная мэта нашай работы - гэта, вядома, стварэнне камфортных умоў для жыцця грамадзян. Прэзідэнтам Беларусі падкрэслена неабходнасць удзяляць асаблівую ўвагу вырашэнню звычайных злабадзённых пытанняў, з якімі сутыкаюцца нашы людзі, каб яны бачылі, асабліва напярэдадні юбілею, што Саюзная дзяржава - гэта магутнае аб'яднанне, добры праект, здольны вырашаць усе праблемы. Праведзены комплексны аналіз пытанняў, якія патрабуюць неадкладных рашэнняў. Сёння мы заслухаем профільныя ведамствы аб сістэмных прапановах у розных галінах сацыяльна-гуманітарнай сферы", - сказаў Дзмітрый Крутой.
Так, у полі пастаяннай увагі Групы высокага ўзроўню знаходзіцца кошт роўмінгу на тэрыторыі Саюзнай дзяржавы. "Таксама ёсць добрыя зрухі па пагадненні аб узаемным прызнанні віз. Разлічваем, што сумеснымі намаганнямі мы нарэшце справімся з чэргамі на нашых граніцах - і сухапутных, і паветраных, і вырашым гэту праблему. З 1 лістапада будзе запушчаны дадатковы электрапоезд "Ластаўка" па маршруце Мінск-Масква. Гэта вельмі своечасовае рашэнне з улікам росту пасажырскіх перавозак паміж нашымі краінамі на 20 працэнтаў. Сёння ў нас у рэгулярных зносінах курсіруюць 22 паязды. Масква, Санкт-Пецярбург, Калінінград, Мурманск, Архангельск, Самара, Ніжні Ноўгарад - геаграфія расійскіх гарадоў расце. Нельга зніжаць работу і па прамых авіярэйсах. Але там таксама добрая лічба ад 30 працэнтаў да 40 працэнтаў росту", - адзначыў кіраўнік Адміністрацыі Прэзідэнта.-0-
Фота Мікалая Пятрова
Падпісвайцеся на нас у
