Рэспубліканскі праект "Пульс моладзі" стартуе ў Беларусі 4 сакавіка

2 сакавіка, Мінск /Кар. БЕЛТА/. Рэспубліканскі праект "Пульс моладзі" стартуе ў Беларусі 4 сакавіка. Аб гэтым карэспандэнту БЕЛТА паведаміў сакратар ЦК БРСМ Аляксандр Давыдоўскі.

"Праект доўгатэрміновы і накіраваны на фарміраванне ўстойлівай сістэмы арганізаванага і змястоўнага вольнага часу моладзі, што садзейнічае сацыяльнай актывізацыі маладых людзей, развіццю іх асобасных і камунікатыўнах кампетэнцый, а таксама пашырэнню ўключанасці ў дзейнасць БРСМ. "Пульс моладзі" аб'ядноўвае сучасныя і запатрабаваныя моладдзю фарматы мерапрыемстваў. У іх ліку - інтэлектуальныя гульні, музлато і караоке-батлы, вечары настольных гульняў, кібертурніры, а таксама культурна-асветныя і адукацыйныя ініцыятывы, арыентаваныя на развіццё лідарскіх якасцей і каманднага ўзаемадзеяння", - сказаў Аляксандр Давыдоўскі.

Паводле яго слоў, першым мерапрыемствам у рамках праекта стане інтэлектуальная гульня "Жаночыя імёны на карце Беларусі", прымеркаваная да Года беларускай жанчыны.

"У рамках праекта Цэнтральным камітэтам БРСМ распрацавана інтэлектуальная гульня "Жаночыя імёны на карце Беларусі", якая ўключае шэсць тураў па 10 пытанняў. Кожнае з іх - гэта магчымасць успомніць і па-новаму адкрыць імёны выдатных жанчын, якія ўнеслі значны ўклад у развіццё Беларусі. Удзельнікі пазнаёмяцца з гісторыямі тых, хто мяняў ход падзей, развіваў навуку, культуру, спорт і адукацыю, абараняў Радзіму ў гады ваенных выпрабаванняў і прадаўжае натхняць сучаснае пакаленне сваім прыкладам", - адзначыў Аляксандр Давыдоўскі.

Першымі правераць свае веды ў інтэлектуальнай гульні ўдзельнікі рэспубліканскага злёту маладых работнікаў вёскі "АграБудучыня", які пройдзе 4-6 сакавіка на тэрыторыі Мінска і Мінскай вобласці. Далей эстафету правядзення гульняў прымуць тэрытарыяльныя камітэты Саюза моладзі, у пярвічных арганізацыях яны пройдуць у перыяд з 5 па 13 сакавіка.-0-