15 жніўня, Мінск /Кар. БЕЛТА/. Важна захаваць нашу краіну мірнай і стабільнай. Рэктарат БНТУ звярнуўся да навучэнцаў, выкладчыкаў, калег і выпускнікоў. Зварот апублікаваны на сайце ВНУ, паведамляе БЕЛТА.
"За сваю стагадовую гісторыю Беларускі нацыянальны тэхнічны ўніверсітэт не раз станавіўся сведкам пераломных момантаў гісторыі і ведае, як важна захоўваць цвярозы розум і разважлівасць. Бо менавіта ад нашых узважаных і разумных рашэнняў залежыць тое, якім будзе наша з вамі заўтра. Мы ганарымся тым, што выпускнікі БНТУ сваёй настойлівай працай стваралі і ствараюць нашу прыгожую краіну з яе жылымі комплексамі, дарогамі і мастамі, электрастанцыямі, аўтамабілямі, метро, сучаснай інфраструктурай. Нам важна захаваць нашу краіну мірнай і стабільнай", - гаворыцца ў звароце.
БНТУ просіць кожнага студэнта, выкладчыка, работніка, выпускніка, кожнага беларуса знайсці ў сабе сілы і мудрасць вырашаць пытанні не ў вулічных канфліктах, а шляхам цывілізаваных перагавораў. "Мы гатовы выступіць той самай пляцоўкай, на якой кожны з вас зможа выказаць сваё меркаванне і будзе пачуты. Мы заклікаем паважліва ставіцца да меркавання адзін аднаго, не ўдзельнічаць у вулічных канфліктах і мітынгах, не паддавацца на правакацыі і заклікі да насілля. Мы ўсе хочам прадаўжаць спакойна жыць, працаваць і гадаваць дзяцей у мірнай і бяспечнай краіне", - адзначылі ў ВНУ.-0-