21 верасня, Мінск /Кар. БЕЛТА/. Сяргей Рубніковіч, узгоднены сёння кіраўніком дзяржавы на пасаду рэктара Беларускага дзяржаўнага медыцынскага ўніверсітэта, выступае за ўзмацненне практычнага складніка ў вучэбным працэсе ВНУ. Аб гэтым ён заявіў сёння журналістам, перадае карэспандэнт БЕЛТА.
На новай пасадзе Сяргей Рубніковіч мае намер сканцэнтравацца на павышэнні якасці і эфектыўнасці падрыхтоўкі студэнтаў БДМУ. Сярод асноўных задач ён таксама назваў павышэнне канкурэнтаздольнасці і рэзультатыўнасці ўніверсітэта ў адукацыйнай, лячэбнай, навукова-даследчай рабоце, павышэнне эканамічнай эфектыўнасці і павелічэнне экспарту адукацыйных паслуг.
Адзін з важных напрамкаў у рабоце ВНУ - узмацненне практычнага складніка. На гэта звяртаў увагу і Прэзідэнт у час наведвання БДМУ ў 2019 годзе. На думку рэктара, неабходна вызначыць сістэму ўніверсітэцкіх клінік па асноўных напрамках дзейнасці ўніверсітэта. "Гэта і лячэбная справа, медыка-прафілактычны і фармацэўтычны напрамкі, педыятрыя, стаматалогія. Па кожным з гэтых напрамкаў у нас павінны быць свае ўніверсітэцкія базавыя клінікі, дзе будзе праводзіцца практыка-арыентаваная падрыхтоўка высокакваліфікаваных спецыялістаў, - упэўнены Сяргей Рубніковіч. - Павінен быць праведзены перагляд вучэбных праграм з улікам практыкаарыентаванасці іх падрыхтоўкі".
Рэктар лічыць, што трэба прадоўжыць удасканаленне сімуляцыйных цэнтраў. "Магчыма іх трансфармацыя ў вялікія цэнтры, дзе студэнты будуць адпрацоўваць на трэнажорах, сімуляцыйным абсталяванні, 3D-станках навыкі па выкананні складаных хірургічных аперацый, высокатэхналагічных маніпуляцый", - выказаў меркаванне ён.
"Адзін са складнікаў работы са студэнтамі - уключэнне ў навукова-даследчую работу. Кожны студэнт павінен з першых курсаў уключацца ў такую работу, - падкрэсліў Сяргей Рубніковіч. - У нас ёсць дамоўленасць з НАН па стварэнні сумесных аб'яднанняў, навуковых кластараў па напрамках, якія цяпер у трэндзе сусветнай навукі. Гэта і біятэхналогіі, клетачныя, геномныя тэхналогіі, стварэнне новых метадаў дыягностыкі".
Хутка ў Беларусі з'явіцца такая форма паслядыпломнай адукацыі, як рэзідэнтура, адпаведныя змяненні змешчаны ў праекце закона аб ахове здароўя. Гэта дасць магчымасць дадаткова навучаць запатрабаваных спецыялістаў з улікам сучасных медыцынскіх тэхналогій, павышаць іх кваліфікацыю.-0-