ДЗЯРЖОРГАНЫДЗЯРЖОРГАНЫ
Флаг Панядзелак, 30 студзеня 2023
Мінск -1°C
Усе навіны
Усе навіны
Грамадства
09 снежня 2022, 15:25

Развіццё Віцебскага рэгіёна абмеркавала Качанава з яго актывам

9 снежня, Полацк /Алеся Пушнякова - БЕЛТА/. Старшыня Савета Рэспублікі Нацыянальнага сходу Беларусі Наталля Качанава ў Полацку правяла сустрэчу з актывам Віцебскай вобласці ў фармаце дыялогавай пляцоўкі, перадае карэспандэнт БЕЛТА.

Старшыня Савета Рэспублікі сустрэлася з дэпутацкім корпусам паўночнага рэгіёна, кіраўнікамі аблвыканкама і райвыканкамаў. Перад пачаткам сустрэчы Наталля Качанава акцэнтавала ўвагу на тым, што гатова адказаць на ўсе актуальныя і надзённыя пытанні, якія ўзніклі на месцах: "Хачу, каб вы былі гатовы да адкрытай і давернай размовы".

Наталля Качанава адзначыла, што год падыходзіць да канца, краіна падводзіць вынікі, якая работа была праведзена ў бягучым годзе, і ўжо з'яўляюцца планы на наступны год. "У першым чытанні ў Палаце прадстаўнікоў мы разгледзелі законапраект аб бюджэце на 2023 год. Бюджэт захоўвае сваю сацыяльную накіраванасць. Тыя задачы, якія былі пастаўлены VI Усебеларускім народным сходам і Прэзідэнтам Беларусі ў частцы прыярытэтных напрамкаў развіцця нашай краіны, застаюцца нязменнымі. І якія б няпростыя сітуацыі ні складваліся ў свеце - гэта санкцыйны націск на нашу краіну, і бягучая сітуацыя вакол нашай краіны, - ніводная сацыяльная праграма, ніводны напрамак, які быў вызначаны, не закрыты. Праграмы ўсе дзейнічаюць, будуць працаваць. Больш таго, бюджэт прадугледжвае павелічэнне расходаў на ахову здароўя, адукацыю - тое, што сёння ў нас у прыярытэце", - расказала спікер.

Наталля Качанава адзначыла, што на сустрэчы сабраліся людзі, якія адказваюць за тое, што сёння адбываецца ў вобласці, у кожным асобна ўзятым рэгіёне і горадзе. "На вас ускладзена сур'ёзная адказнасць - выкананне тых задач, якія пастаўлены кіраўніцтвам краіны перад мясцовымі органамі ўлады, дэпутацкім корпусам і вызначаны асноўнымі напрамкамі развіцця. Гэта святы абавязак кожнага кіраўніка на месцах", - падкрэсліла старшыня Савета Рэспублікі.

Спікер нагадала, што ад выканання прагнозных паказчыкаў сацыяльна-эканамічнага развіцця залежыць фарміраванне бюджэту і ў далейшым рэалізацыя дзяржпраграм. "Падводзячы вынікі бягучага года, мы бачым, хто і як спрацаваў, якія рэгіёны лепшыя, дзе ёсць праблемы і чаму. Але для таго каб працавала паспяхова эканоміка, Прэзідэнтам і VI Усебеларускім народным сходам вызначаны асноўны напрамак - гэта раўнамернае развіццё рэгіёнаў. І ад таго, як яны развіваюцца, зразумела, як далей будзе жыць наша краіна. Менавіта тут фарміруецца ўсё - эканоміка краіны, чалавечы патэнцыял, ідэалогія і наша нацыя як беларусаў", - расказала Наталля Качанава, якая бывае ў розных рэгіёнах краіны і бачыць, чым жывуць людзі.

Старшыня Савета Рэспублікі адзначыла, што для дастойнага жыцця ў кожным горадзе і раёне створаны ўсе ўмовы, ёсць вертыкаль улады і структуры, якія працуюць на карысць людзей: "Пастаўлена задача - развіццё эканомікі ў плане адкрыцця прадпрыемстваў і вытворчасцей у асобна ўзятым раёне або горадзе. Мы разумеем, што калі будзе работа і будуць створаны ўсе ўмовы ў райцэнтрах, то людзі застануцца і будуць там жыць".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі