24 верасня, Гомель /Кар. БЕЛТА/. Далейшае развіццё навукі экалогіі чалавека, практыка-арыентаванага навучання, клінічных баз - гэтыя задачы назваў сёння ў ліку важнейшых для Гомельскага дзяржаўнага медыцынскага ўніверсітэта выконваючы абавязкі міністра аховы здароўя Дзмітрый Піневіч у час прадстаўлення калектыву ВНУ новага рэктара Ігара Стомы, перадае карэспандэнт БЕЛТА.
Выконваючы абавязкі міністра аховы здароўя адзначыў, што ГДМУ - самы малады медуніверсітэт у краіне, самы інтэнсіўны, універсітэт, які шукае шляхі развіцця і які знайшоў сваю нішу ў галіне медыцынскай адукацыі. "Універсітэт мае сваю асаблівасць - гэта разгляд праблем чалавека комплексна", - сказаў Дзмітрый Піневіч.
У ВНУ асаблівую ўвагу ўдзяляюць тэме экалогіі чалавека. Над ёй працуюць у супрацоўніцтве з профільным РНПЦ, некаторымі аддзяленнямі акадэміі навук. Усе навуковыя пошукі, пабудова вучэбнага працэсу арыентаваны менавіта на гэту тэму, падкрэсліў Дзмітрый Піневіч. Паводле яго слоў, у ВНУ шмат канкрэтных захадаў для практычнай рэалізацыі, таму важна далейшае развіццё гэтага напрамку. "Мы павінны даць большы штуршок у развіцці навукі экалогіі чалавека. Лічу, што сфарміраваны тут навуковы калектыў павінен згенерыраваць тыя ідэі, у якіх маюць патрэбу і грамадская ахова здароўя, і медыцынская навука ў цэлым", - сказаў выконваючы абавязкі міністра аховы здароўя.
У ліку асноўных задач ён назваў і развіццё практыка-арыентаванага навучання - з першага курса да выпускнога. "Мы ўступаем у перыяд мадыфікацыі постдыпломнай адукацыі. З 2023 года пераходзім на падрыхтоўку кадраў у рамках рэзідэнтуры. Па многіх спецыяльнасцях уваход у прафесію будзе яшчэ суправаджацца навучаннем ад трох да пяці гадоў", - звярнуў увагу Дзмітрый Піневіч. Працэс прадугледжвае зваротную сувязь, калі ВНУ мае намер глядзець, які будзе спецыяліст праз 8-20 гадоў. "Гэта вельмі важнае пытанне ў фарміраванні асобы новага доктара. Паколькі выключная асаблівасць прафесіі ў медыцынскай сферы ў тым, што медработнік абавязаны вучыцца заўсёды, на працягу ўсёй прафесійнай дзейнасці", - дадаў выконваючы абавязкі міністра аховы здароўя.
Развіццё ўніверсітэта прадугледжвае і развіццё клінічных баз. Гэта тэма таксама ў ліку прыярытэтных.
"Мы будзем вырашаць пытанні інтэрнатаў", - падкрэсліў Дзмітрый Піневіч. Гэта дапаможа рэалізаваць у поўным аб'ёме экспартны патэнцыял універсітэта.
Самыя цёплыя словы ўдзячнасці на цырымоніі прадстаўлення новага рэктара былі адрасаваны Анатолю Лызікаву, які кіраваў ВНУ з 2007 года, падкрэслены яго вялікі асабісты ўклад у фарміраванне калектыву, імені, іміджу, якаснай ацэнкі работы ГДМУ. Дзмітрый Піневіч выказаў упэўненасць, што тэндэнцыі, закладзеныя Анатолем Лызікавым, ва ўніверсітэце будуць прадаўжацца.-0-
