12 жніўня, Мінск /Кар. БЕЛТА/. Усяго на тэрыторыі Фрунзенскага раёна сталіцы 50 устаноў адукацыі. Большая частка з іх пацярпела ад актаў вандалізму. Аб гэтым карэспандэнту БЕЛТА паведаміла кіраўнік ДУ"Цэнтр па забеспячэнні дзейнасці ўпраўлення па адукацыі адміністрацыі Фрунзенскага раёна г.Мінска і падведамных арганізацый" Таццяна Кузьмянкова.
"Ва ўстановах адукацыі Фрунзенскага раёна фіксуюць акты вандалізму: разбіта шкло, уваходныя дзверы, умывальнікі, унітазы. Пашкоджаны сцены ў калідорах, знята пакрыццё на стадыёнах, разбіты пляцоўкі для вывучэння ПДР, зламаны вароты, зроблены надпісы на тратуарнай плітцы, асфальце, фасадах будынкаў. Нават дзіцячыя горкі і баскетбольныя шчыты зламаны і разбіты", - расказала Таццяна Кузьмянкова.
Паводле яе слоў, цэнтрам былі прыняты ўсе меры для падрыхтоўкі ўстаноў да новага навучальнага года. Былі адрамантаваны харчаблокі, фасады, класы, санвузлы, заменены вокны, абноўлены спартыўныя пляцоўкі і стадыёны. "Вядома, мы будзем ліквідаваць наступствы вандалізму з дапамогай Мінгарвыканкама і падрыхтуем установы да новага навучальнага года. Прымаем усе меры для таго, каб прывесці будынкі, тэрыторыі ў належны стан да 1 верасня. Дзеці павінны вучыцца ў светлых добрых класах, займацца спортам на сучасных пляцоўках. Няўжо дарослыя не разумеюць гэтага? Калі ласка, спыніцеся, не граміце школы!", - заклікала Таццяна Кузьмянкова.
Яна таксама адзначыла, што ў Фрунзенскім раёне пражывае самая вялікая колькасць шматдзетных сем'яў. "Сацыяльная падтрымка вельмі значная. Дзеці з такіх сем'яў атрымліваюць бясплатныя падручнікі, харчаванне ў школах, матэрыяльную дапамогу да новага навучальнага года, падарункі на Новы год, 50-працэнтную скідку на платныя адукацыйныя паслугі ў школах", - канстатавала Таццяна Кузьмянкова.
Акрамя таго, у ноч з 10 на 11 жніўня невядомыя спрабавалі ўчыніць падпал сярэдняй школы нумар 84 у Мінску па вул.Панамарова на тэрыторыі ваеннага гарадка Уручча. У будынку сапсаваны тры акны. Пашкоджаны і помнік Леніну, які знаходзіцца на тэрыторыі ўстановы адукацыі.-0-
