22 сакавіка, Мінск /Кар. БЕЛТА/. Дэлегацыя Нацыянальнай акадэміі навук Беларусі прымае ўдзел у аграпрамысловым форуме і міжнароднай спецыялізаванай выстаўцы "Агракомплекс-2023" ва Уфе, якія прадоўжацца да 24 сакавіка, паведамілі БЕЛТА ў прэс-службе НАН.
Прадстаўнікі падведамных НАН Беларусі арганізацый дэманструюць на выстаўцы найноўшыя распрацоўкі ў галіне беспілотных лятальных апаратаў (сельскагаспадарчы комплекс А-60Х, абсталяваны сістэмай распылення, комплекс маніторынгу і картаграфіі на базе БЛА мадэлі А-10V) вытворчасці кітайска-беларускага сумеснага закрытага акцыянернага таварыства "Авіяцыйныя тэхналогіі і комплексы". Таксама там прадстаўлены новыя сарты і тэхналогіі вырошчвання алейнага лёну (Інстытут лёну), тэхналогіі і інавацыйныя пакрыцці для вытворчасці сельгастэхнікі і абсталявання (Фізіка-тэхнічны інстытут).
"Дэлегацыя НАН на форуме шукае патэнцыяльных партнёраў у галіне аграпрамысловага комплексу для ўзаемавыгаднага супрацоўніцтва. Гэта мае асаблівую значнасць напярэдадні X Форуму рэгіёнаў Беларусі і Расіі, які пройдзе ва Уфе 26-28 чэрвеня", - адзначылі ў прэс-службе.
Аграпрамысловы форум і выстаўка ва Уфе - штогадовае маштабнае кангрэсна-выставачнае мерапрыемства для спецыялістаў АПК, на якім дэманструюцца найноўшыя ўзоры сельскагаспадарчай тэхнікі і абсталявання, сучасныя тэхналогіі ў сферы аграрнай вытворчасці, арганізавана дэгустацыя прадукцыі вядучых перапрацоўчых прадпрыемстваў. Яго асноўная задача - стварэнне эфектыўнай пляцоўкі для дыялогу паміж галіновымі кампаніямі, органамі дзяржаўнай улады, асацыяцыямі і навуковай супольнасцю Расіі і краін-партнёраў.-0-
