5 красавіка, Мінск /Кар. БЕЛТА/. Старшыня Вярхоўнага суда Валянцін Сукала, гаворачы аб перспектывах развіцця судовай сістэмы на бліжэйшае пяцігоддзе, адзначыў неабходнасць павышаць аператыўнасць аднаўлення парушаных правоў і адкрытасць правасуддзя, прымаць справядлівыя і зразумелыя людзям рашэнні. Аб гэтым ён заявіў сёння на нарадзе па пытаннях удасканалення дзейнасці судоў агульнай юрысдыкцыі, перадае карэспандэнт БЕЛТА.
Перапынкі, адкладанні, прыпыненні ўплываюць на судовыя выдаткі, расходы. "Нам неабходна ў бліжэйшы час прадоўжыць тыя паспяховыя рэформы па павышэнні (якасці і аператыўнасці. - Заўвага БЕЛТА) усяго працэсу правасуддзя - ад першай да вышэйшай інстанцыі. Нам трэба далей развіваць тую апеляцыю, якую мы ўвялі, скарачаць умяшанне на стадыі нагляду і зрабіць правасуддзе сціслым, эканомным, сучасным і аператыўным", - сказаў Валянцін Сукала.
Ён падкрэсліў, што грамадзяне хочуць бачыць жыццёвыя, чалавечыя рашэнні, якія ўспрымаліся б, выконваліся, былі зразумелыя людзям. "Таму праз такія новыя крытэрыі ацэнкі якасці мы будзем зыходзіць у наступным пяцігоддзі: не проста правільнае рашэнне, пакінутае ў сіле, а рашэнне, можа, смелае, часам нетрадыцыйнае, але жыццёвае. Зразумела, сумленнае, справядлівае", - сказаў старшыня Вярхоўнага суда.
Прадоўжыцца работа па павышэнні адкрытасці, публічнасці і галоснасці правасуддзя. Судовыя рашэнні будуць публікавацца ў адкрытых банках даных. Важнейшы напрамак - укараненне сучасных інфармацыйных тэхналогій.
У цэлым, паводле слоў старшыні Вярхоўнага суда, правасуддзе павінна адыгрываць больш значную ролю ў вырашэнні агульнадзяржаўных задач, што стаяць на сучасным этапе развіцця грамадства і дзяржавы. Рашэнні павінны стымуляваць і развіваць перадавыя тэндэнцыі, якія ёсць у розных сферах дзейнасці, не тармазіць, а нават ісці наперадзе некаторых працэсаў. "Наша аналітычная работа павінна быць узнята на зусім новы ўзровень", - сказаў ён.
Асобна Валянцін Сукала выказаўся аб кадравым складзе. Ён звярнуў увагу, што сёння адзначаецца няхватка якаснай юрыдычнай адукацыі і гэта звязана з тым, што ў апошнія гады пастаўлена на паток камерцыйная адукацыя. "Як вынік - атрымліваем юрыстаў сярэдняй падрыхтаванасці", - сказаў ён.
Прэзідэнт Беларусі Аляксандр Лукашэнка, рэагуючы на гэта выказванне, адзначыў, што пачуў пасыл старшыні Вярхоўнага суда наконт камерцыйнай адукацыі. "Дзякуй богу, што мы ўсё ў камерцыю не аддалі", - сказаў кіраўнік дзяржавы.
Старшыня Вярхоўнага суда таксама звярнуў увагу на высокі ўзровень грамадскага даверу да суда. Гэты паказчык часта вызначаюць шляхам сацапытанняў. У той жа час ёсць і мноства аб'ектыўных крытэрыяў, якія сведчаць аб высокай ступені даверу да правасуддзя: гэта колькасць тых, хто звяртаецца ў суды, колькасць абскарджаных судовых рашэнняў, скарачэнне колькасці скаргаў і нараканняў на работу судоў.
Як адзначыў генеральны пракурор Аляксандр Канюк, на працягу апошніх пяці гадоў расце колькасць спраў, вернутых пракурорамі для дадатковага расследавання ў сувязі з дапушчанымі парушэннямі. У выніку за апошнія сем гадоў колькасць апраўданых асоб скарацілася ў 11 разоў.
Перагледжаны таксама падыходы да апеляцыйнага апратэставання, у выніку колькасць пратэстаў скарацілася на трэць. Разам з тым у гэтых адносінах наперадзе яшчэ вялікая работа.
Паводле слоў Аляксандра Канюка, трохгадовая практыка работы ва ўмовах апеляцыі абазначыла неабходнасць далейшага заканадаўчага развіцця гэтай стадыі судовага працэсу, у тым ліку шляхам пашырэння правоў суда па даследаванні доказаў.-0-
