25 сакавіка, Мінск /Кар. БЕЛТА/. Міністэрства адукацыі пакуль не прымала рашэння аб пераносе на больш позні тэрмін ЦТ і прыёмнай кампаніі ў ВНУ, паведаміў начальнік галоўнага ўпраўлення прафесійнай адукацыі Мінадукацыі Сяргей Каспяровіч у час стрыму для студэнтаў, перадае карэспандэнт БЕЛТА.
"На сённяшні дзень рашэнне аб пераносе ЦТ, а таксама прыёмнай кампаніі не прымалася", - сказаў Сяргей Каспяровіч.
Рэгістрацыя на ЦТ праводзіцца ў маі, само цэнтралізаванае тэсціраванне - у чэрвені. Прыёмная кампанія ў ВНУ ў асноўным прыпадае на ліпень, у ССНУ і прафтэхустановы пачынаецца ў чэрвені і завяршаецца ў жніўні. "Тут мы рашэнні будзем прымаць паслядоўна", - дадаў начальнік галоўнага ўпраўлення.
Разам з тым асноўныя этапы рэпетыцыйнага тэсціравання перанесены на май.
Што датычыцца канчатковага размеркавання студэнтаў-медыкаў, яго плануецца правесці ў маі, адзначыў міністр аховы здароўя Уладзімір Каранік. "У любым выпадку без работы ніхто дакладна не застанецца. Першае месца працы будзе прапанавана кожнаму", - сказаў ён.-0-
