27 верасня, Мар'іна Горка /Кар. БЕЛТА/. Кіраўнік Адміністрацыі Прэзідэнта праводзіць прыём грамадзян у Пухавіцкім райвыканкаме, перадае карэспандэнт БЕЛТА.
Прыём грамадзян праходзіць у рамках рабочай паездкі кіраўніка Адміністрацыі Прэзідэнта ў Пухавіцкі раён. Перад прыёмам грамадзян Ігар Сергяенка прыняў удзел у пасяджэнні Пухавіцкага райвыканкама. На пасяджэнні разглядалася пытанне аб выніках работы па выкананні Дырэктывы Прэзідэнта "Аб дэбюракратызацыі дзяржаўнага апарату і павышэнні якасці забеспячэння жыццядзейнасці насельніцтва" за першае паўгоддзе.
На прыём да кіраўніка Адміністрацыі Прэзідэнта запісаліся каля 20 заяўнікаў. Грамадзян хвалююць пытанні якасці пітной вады, рамонту дарог, транспартных зносін.
"Фарматы работы з насельніцтвам бываюць рознымі. Я загадзя прыняў рашэнне правесці прыём грамадзян пасля пасяджэння ў райвыканкаме. У асноўным гэта жыхары Мінскай вобласці. Папярэдні аналіз паказаў, што ёсць людзі, якія звяртаюцца не ўпершыню. Я ўпэўнены, што кожны, хто запісаўся на прыём, атрымае адказ. Калі нейкае пытанне немагчыма вырашыць, то так і будзе сказана. Калі пытанне вырашаецца ў сярэднетэрміновай перспектыве, мы так і растлумачым", - расказаў журналістам кіраўнік Адміністрацыі Прэзідэнта.
Кіраўнік Адміністрацыі Прэзідэнта адзначыў, што ў гэтым годзе кіраўніцтва Пухавіцкага раёна прыняло канкрэтныя меры для эфектыўнага задзейнічання патэнцыялу ўсіх існуючых рэсурсаў. Увага таксама была ўдзелена разгляду зваротаў грамадзян і павышэнню якасці жыцця.
"У гэтым годзе колькасць зваротаў жыхароў Мінскай вобласці ў Адміністрацыю Прэзідэнта зменшылася на чвэрць, а колькасць зваротаў жыхароў Пухавіцкага раёна - амаль у два разы, г.зн. многія пытанні вырашаюцца непасрэдна на месцы", - звярнуў увагу Ігар Сергяенка.
Гэтыя пытанні датычацца развіцця сферы жыллёва-камунальнай гаспадаркі, добраўпарадкавання, дарог, аховы здароўя. "Гэта тыя напрамкі, з якімі сутыкаюцца нашы людзі ў штодзённай дзейнасці. Хачу яшчэ раз адзначыць, што кіраўніцтва раёна актывізавала сваю работу ў гэтым напрамку. Вядома, усе праблемы не здымаюцца адназначна. Трэба не баяцца гаварыць і даносіць праўду, выкарыстоўваць розныя формы і метады", - перакананы кіраўнік Адміністрацыі Прэзідэнта.
Ён дадаў, што Пухавіцкі раён даволі вялікі, тут пражывае амаль 68 тыс. чалавек: "На тэрыторыі раёна знаходзіцца шэраг гарадскіх, рабочых пасёлкаў, таму сістэма ЖКГ патрабуе развіцця і ўдасканалення. Трэба дакладна растлумачыць, калі тое ці іншае пытанне атрымаецца вырашыць, калі гэта немагчыма цяпер. Адразу ўсе праблемы складана вырашыць. Але ў аснове павінен стаяць клопат аб канкрэтным чалавеку".
Яшчэ адной немалаважнай тэмай, якую закрануў Ігар Сергяенка, з'яўляецца ўключэнне насельніцтва ў грамадскія ініцыятывы. "Ёсць глабальныя пытанні, якія вырашае ўлада. А ёсць пытанні тэрытарыяльнага ўзроўню, напрыклад пасялковага, дзе людзі могуць самі выйсці і з нейкай мінімальнай дапамогай дзяржавы добраўпарадкаваць тую ці іншую тэрыторыю", - рэзюмаваў ён.-0-
