17 студзеня, Мінск /Кар. БЕЛТА/. Праект "Школа актыўнага грамадзяніна" з'яўляецца паспяховым і запатрабаваным, заявіла сёння ў час анлайн-канферэнцыі на сайце БЕЛТА намеснік дырэктара па метадычнай рабоце Нацыянальнага інстытута адукацыі Людміла Раманоўская.
"Праект "Школа актыўнага грамадзяніна" рэалізуецца ўжо другі год. Гэта, на мой погляд, адзін з самых маштабных і вядомых рэспубліканскіх праектаў", - сказала Людміла Раманоўская.
Паводле яе слоў, ёсць некалькі фактараў паспяховасці праекта. "Па-першае, яго асновай стала эфектыўная інфармацыйна-прапагандысцкая работа, якая ва ўстановах агульнай сярэдняй адукацыі ажыццяўляецца яшчэ з 2003 года. Праект стаў імпульсам, новай прыступкай у развіцці гэтага напрамку работы ў школах. Другі фактар - метадычная структура: тры крокі, якія мы ажыццяўляем у час кожнага мерапрыемства праекта ("Мы даведваемся". "Мы разважаем". "Мы дзейнічаем"). Па-трэцяе, гэта метадычнае суправаджэнне праекта. На Нацыянальным адукацыйным партале штомесяц размяшчаем інфармацыйныя, метадычныя матэрыялы, мультымедыйную прэзентацыю, усё тое, што забяспечвае эфектыўную рэалізацыю нашых трох крокаў", - адзначыла намеснік дырэктара.
Сярод фактараў паспяховасці Людміла Раманоўская назвала прадастаўленне магчымасці ўстановам адукацыі самім выбраць арганізацыйную мадэль паводзін. "Мы не ставілі сваёй задачай заснаваць усім аднолькавыя арганізацыйныя рамкі, таму што адна актавая зала ўстаноў адукацыі ў адной школе адрозніваецца ад другой з пункту гледжання пасадачных месцаў, і паралеляў у класе розных школ можа быць розная колькасць. Мы прадугледзелі ў арганізацыйных механізмах рэалізацыі праекта розныя мадэлі, якія выкарыстоўваюцца ўстановамі адукацыі", - падкрэсліла яна.
Людміла Раманоўская расказала, што ўстановы адукацыі актыўна дзеляцца вопытам рэалізацыі праекта "ШАГ". "На Нацыянальным адукацыйным партале ў раздзеле "ШАГ" ёсць вельмі цікавая рубрыка - "Лепшая школа актыўнага грамадзяніна". Важным паказчыкам таго, што праект жыве паўнацэнным жыццём, прыняты, зразумелы і падтрыманы, з'яўляецца тое, што ў рубрыку ўстановы адукацыі ўжо на працягу двух гадоў прысылаюць свой вопыт, фатаграфіі, дзеляцца ўражаннямі, якім чынам у іх праходзяць гэтыя сустрэчы ў час праекта. Больш таго, да нас паступаюць званкі ад прадстаўнікоў органаў дзяржаўнага кіравання, якія вельмі цікавяцца праектам, прысылаюць нам матэрыялы. Гэта адзін з паказчыкаў таго, што праект патрэбны, актуальны і падтрыманы", - дадала яна.
Праект будзе развівацца далей. "Каб даць праекту магчымасць выйсці на новы віток развіцця, на Нацыянальным адукацыйным партале мы арганізавалі інтэрактыўную інтэрнэт-пляцоўку для суправаджэння нашага трэцяга кроку "Мы дзейнічаем". Гэта самы важны крок, які мае рэфлексіўны характар, прадугледжвае выхад на канкрэтныя дзеянні і сацыяльныя ініцыятывы. Інтэрактыўная пляцоўка дае магчымасць абмяняцца вопытам арганізацыі сацыяльных ініцыятыў. Будзем з задавальненнем прымаць матэрыялы, якія ўстановы адукацыі будуць нам прысылаць. Спадзяёмся, што наш праект будзе крочыць па ўстановых адукацыі ўсё гэтак жа паспяхова",- адзначыла намеснік дырэктара.-0-
