Рачкоў: усе міжнародныя кантакты парламентарыяў арыентаваны на канкрэтныя вынікі


 

10 верасня, Мінск /Кар. БЕЛТА/. Усе міжнародныя кантакты парламентарыяў арыентаваны на канкрэтныя вынікі, заявіў журналістам старшыня Пастаяннай камісіі па міжнародных справах Палаты прадстаўнікоў Сяргей Рачкоў перад пасяджэннем Савета Палаты прадстаўнікоў, перадае карэспандэнт БЕЛТА.

"Пытанні міжнароднай дзейнасці знаходзяцца ў цэнтры ўвагі Савета Палаты прадстаўнікоў. Гэты калегіяльны орган на сістэмнай аснове разглядае развіццё міжпарламенцкага супрацоўніцтва, перш за ўсё з замежнымі парламентамі, і наша ўзаемадзеянне з міжпарламенцкімі структурамі, - расказаў Сяргей Рачкоў. - Мы выконваем патрабаванне кіраўніка дзяржавы, каб усе нашы міжнародныя кантакты, паездкі, візіты былі арыентаваны на канкрэтныя вынікі. Таму і бліжэйшыя паездкі і візіты будуць звязаны перш за ўсё з развіццём міжпарламенцкага супрацоўніцтва і акцэнт будзе рабіцца на гандлёва-эканамічных пытаннях. У прыватнасці, мы плануем у рамках абмеркавання парламенцкіх тэм закранаць і канкрэтныя тэмы эканамічнага, інвестыцыйнага супрацоўніцтва, прапрацоўку пытанняў і тых дамоўленасцей, якія прымаюцца на ўрадавым узроўні, і ўдзелу парламентарыяў у пашырэнні эканамічных інтарэсаў".

Дэпутат не выключыў, што ў склад парламенцкіх дэлегацый таксама будуць уключацца і прадстаўнікі дзелавых колаў, якія непасрэдна займаюцца эканомікай, развіццём гандлёва-эканамічных адносін. "А дэпутаты Палаты прадстаўнікоў будуць не проста суправаджаць гэтыя праекты, а будуць аказваць непасрэдную дапамогу ў іх рэалізацыі", - падкрэсліў ён.